Yak ah jăl jang 2025 - 2030, Đảng ƀô̆ Anih jang vei lăng kon pơlei dêh char Đăk Lăk đei jơnei hơtŏk lơ̆m jơ̆p dêh char đơ̆ng 11,5% 1 sơnăm tŏk tơ̆ kơpal; rim bơngai jang đei yua 160 triu hlj 1 sơnăm; kơjă tơmam drăm tĕch ăn teh đak đe đei hloh 13 tih đôlar; hơvơn 43 triu tơmoi truh tơmang hăm kơsô̆ jên đei yua pơhlom 97.150 tih hlj; tơjur kơsô̆ unh hnam hin dơnuh đei 2% 1 sơnăm, gah tơring kon pơlei kon kông tơjur 3% 1 sơnăm. Tơdrong tơm kơ hơtŏk tơ-iung noh  “puăn tơdrong jang dơnơm” đei kŏng ngĭp, choh jang xa kiơ̆ trong 'nao, tơmang pơhiơ̆ păng mŭk drăm đak dơsĭ; tơguăt hăm hơtŏk kơtang tơdrong asong jang, hơtŏk khua hŏk kŏng ngê̆, tơplih 'nao gơh hơgei, tơplih kơmăi kơsô̆ păng hơtŏk bơngai jang hơgei.

Pơma pơgơ̆r Hop akŏm, Ƀĭ thư Tĭnh uy Đăk Lăk Nguyễn Đình Trung ră hơdah, Hop akŏm 'măng ou ưh hơdrô̆ sơkơ̆t tơdrong jang đei jơnei lơ̆m jăl jang ou ki, mă oei tơlĕch tơchơ̆t ăn minh jăl jang hơtŏk tơ-iung 'nao, sơkơ̆t sơnong chơng trong đơ̆ng Đảng ƀô̆ Anih jang vei lăng kon pơlei dêh char lơ̆m jăl trong pơm kiơ̆ pơkăp hơtŏk tơ-iung pơdrŏng pran kơtang kơ Đăk Lăk.