Pơma ah jơ lêh, bơngai jang lơ̆m Hơnih tơm chinh trĭ, jang lơ̆m Ƀan ƀĭ thư Trần Cẩm Tú hmach bơnê kơ đon bơnôh, sơnong jang đơ̆ng khul chih hla bar tơroi kơ dôm hơnih jang hla bar tơroi lơ̆m teh đak păng đơ̆ng teh đak đe gah tơdrong jang tơroi tơbăt kơ Hop akŏm mă 14 kơ Đảng. Atŭm hăm noh ăn tơbăt, Hop akŏm 14 gô đei pơgơ̆r tơ̆ Hà Nội đơ̆ng năr 19 truh năr 25/1/2026, hăm tơdrong vang akŏm đơ̆ng 1.586 'nu tang măt ăn hloh 5,6 triu đảng viên Đảng Cộng sản Việt Nam, hăm pơkăp “Tơguăt tơguăl – Hiôk hian – Trŏ tơchơ̆t – Pran kơtang – Hơtŏk tơ-iung”. Minh hơnih hơdah hloh lơ̆m tơdrong hơmet ăn Hop akŏm mă 14 noh tơplih 'nao kơtang lơ̆m chih akŏm hla bar pơkăp. 'Măng mă blŭng, 3 tơdrong chih tơroi kăp gĭt (Chih tơroi chinh trĭ, Chih tơroi gah mŭk drăm – tơpôl păng Chih tơroi pơ-'lơ̆ng Đảng) đei akŏm jing minh tơdrong Chih tơroi chinh trĭ drơ̆ng minh.

Ưh hơdrô̆ pơdơh ah tơdrong sơkơ̆t đon tơchĕng, trong pơkăp jang, Hla bar chih tơroi Hop akŏm mă 14 oei akŏm đei tơdrong pơm jang hơdah, sơkơ̆t hơdah trong pơkăp jang păng sơnong pơm jang. Tơdrong mă ou ăn ƀôh khŏm mă 'nhăk Tơchơ̆t tơlĕch iŏk yua lơ̆m tơdrong hơrih kơtă đơ̆ng rŏng kơ hop akŏm, hơmet tơdrong adar lơ̆m tơlĕch jang. Tơdrong iŏk nơ̆r tơgop đơ̆ng kon pơlei hăm Hla bar chih tơroi, hăm jê̆ 14 triu nơ̆r tơgop, jĭ tơdrong bơ̆ng pang kăp gĭt ăn tơdrong tơguăt đơ̆ng Đảng păng đon bơnôh kon pơlei, atŭm hăm noh tơƀôh tơdrong drơ̆ng nơ̆r kơjung hloh lơ̆m tơpôl hăm dôm trong pơkăp jang tih mă Hop akŏm mă 14 tơlĕch. Atŭm hăm noh, tơdrong pơgơ̆r, pơvih pơvăn, vei sơđơ̆ng tơpôl păng tơroi tơbăt đei tơlĕch jang hrôih, tôm tong, tơgop hơtŏk đon lui đơ̆ng kang ƀô̆, đảng viên păng kon pơlei hăm Hop akŏm, pơjing tơdrong drơ̆ng nơ̆r kơjung hloh lơ̆m Đảng păng drơ̆ng lăp lơ̆m tơpôl.