Adrol kơ ‘nŏh, kơsơ̆ brei (20/1), jơ pơma nuh tơ̆ grŭp đơ̆ng dôm Khul tang măt đei pơgơ̆r tơpăt ‘lơ̆ng, gơ̆h hơgei, pơma hơdăh rim tơdrong. Lơ nơ̆r akŏm tơblang hơdăh dôm tơdỏng tih vă jang tŏk teh đak lơ̆m chăl ‘nao, đơ̆ng hơmet pơ ‘lơ̆ng trong pơgơ̆r, hơmet ming khul kơdră pơgơ̆r, hơtŏk đon rơgei mưh vei lăng teh đak, truh hơtŏk tơdrong jang tơplih ‘nao hăm kơmăy sô̆, tưk tơiung khoa hŏk, tơplih ‘nao rơgei, vang tơgop ăn tơdrong jang tŏk pran kơjăp, gơ̆h hơgei păng hơtŏ băl.  

Tơgop nơ̆r ăn Hla ar chih kăl, lơ bơngai tang măt athei hơnơ̆ng tơplih ‘nao tơdrong chĕp kơ̆l pơgơ̆r kiơ̆ trong pơjing tơdrong ‘lơ̆ng, hiôk hian vă jang tŏk, iŏk kon pơlei păng anih tĕch mơdro pơm tơm, atŭm hăm ‘nŏh khŏm hơmet pơ ‘lơ̆ng dôm tơdrong oei tơhlăk, găn trong jang tŏk vă gơ̆h jang mŭk drăm tŏk pran. Dôm nơ̆r tơgop oei tơƀôh hơdăh đomn pơhnŏng chinh trĭ tôch pơneh, đon jang tơnăp tơ̆ hơnăp Đảng, kon pơlei, vang tơgop hơmet pơ ‘lơ̆ng dôm Hla ar  chih kăl tơroi lơ̆m Hop akŏm, pơm lăp hăm tơdrong ‘mĕh vă jang tŏk teh đak lơ̆m chăl ‘nao.

Hơnăn Hop akŏm XIV kơ Đảng tơƀôh hơdăh: “Hơla hla kơ ang hơdăh kơ Đảng, mĭnh jơhngơ̆m, mĭnh đon bơ̆jang kiơ̆ jơnei dôm tơdrong hơgăt hơtŏk tơiung teh đak truh sơnăm 2030; pơm tơm kơdih, hơdrin kơdih, lui ngeh, yak pran lơ̆m chăl jang tŏk đơ̆ng hơdrĕch hơdrŭng...”. ‘Nâu jĭ ‘măng mă blŭng hơnăn Hop akŏm tơƀôh hơdăh hơ pơi ‘meh pơm tơm kơ dih păng hơdrin kơ dih đơ̆ng hơdrĕch hơdrŭng, tơƀôh jơhngơ̆m đon mơ̆t jang hơdai jrŭ să mă lei vei kơjăp tơdrong ‘lơ̆ng păng kơdih. Hơdai hăm 'noh, trong bơ̆jang kăl “Pôm ƀơ̆r đon - Kon pơlei pơm tơm - pơm kiơ̆ tơpăt - Tơplih pran kơtang - Hơtŏk tơiung”. Tơdrong  ‘nâu tơƀôh jơhngơ̆m hơdrin ưh khan lăp pơvei tơdrong sơđơ̆ng mă oei athei pơm đei dôm hơyak tŏk hrĕnh.

Kiơ̆ kơ Thạc sĩ Hà Trung Thành - Bơngai pơtho tơm Khoa Pơjing Đảng, Học viện kang ƀô̆ pơlei tơm HCM akhan, Hla ar chih roi tơbăt chĭnh trĭ đơ̆ng Khŭl chĕp kơ̆l pơgơ̆r Trung ương ưh khan lăp tơƀôh hơdăh trĕng lăng gĭt kăl truh sơnăm 2030 mă oei đei tơdrong athei bơ̆jang: “Ƀai iung pơma hlôi tơƀôh jơhngơ̆m đon tơplih ‘nao, ‘noh jĭ tơƀôh hơdăh ‘meh vă pơm hơyak tơplih pran kơtang, tơpă, pơma tơpă, jang tơpă, đei yua tơpă ưh khan lăp găh mŭk drăm mă pơđĭ hloi găh chĭnh trĭ, tơpôl păng joh ayŏ. Tơƀôh đon hơ pơi ‘meh đơ̆ng hơdrĕch hơdrŭng. Hơtŏk ‘lơ̆ng đon hơdrin pơm tơm kơdih, jang hơdrin kơdih, tơplih pran kơtang, đon lui lơ̆m jăl trong mă Đảng păng kon pơlei hlôi rơih iŏk”.