Pơma pơgơ̆r blŭng, Phŏ kơdră Quốc hội Nguyễn Thị Thanh pơma hơdăh, lăp oei pă hloh 1 khei dơ̆ng, bơngai tăh hla lơ̆m teh đak gô yak mơ̆t lơ̆m năr lêh tih kơ đĭ đăng kon pơlei: Năr pôk rơih Bơngai tang măt Quốc hội jăl XVI, Bơngai tang măt Jơnŭm pơgơ̆r kon pơlei rim tơring jăl jang 2026 - 2031. ‘Nâu jĭ tơdrong jang chĭnh trĭ gĭt kăl kơ teh đak, hơnih kon pơlei bơ̆jang kiơ̆ tơdrong gơh jang păng hơnăp jang gĭt kăl, rơih iŏk dôm bơngai dơ̆ng tang tơ găl tang măt ăn kơ dih vă tơchơ̆t dôm tơdrong gĭt kăl kơ teh đak păng tơring.

Tơ̆ hop akŏm, dôm bơngai lĕch pơjei hlôi mơ̆ng bơngai jang roi tơbăt găh Quốc hội, trong pôk rơih Bơngai tang măt Quốc hội; Tơdrong pơjing, hlôh vao rơih iŏk tơdrong bơ̆jang đơ̆ng bơngai lĕch pơjei Bơngai tang măt Quốc hội; tơdrong vang jang đơ̆ng drŏ kăn păng bơngai kon kông tơ̆ Quốc hội; pơm pơma dơnuh hăm anih jang chih kơtơ̆ng ang lơ̆m krao hơvơn pôk rơih.