Tơ̆ hop akŏm, Kơdră Quốc hội Trần Thanh Mẫn tơchĕng ‘lơ̆ng akhan, sơnăm âu ki 2 păh vang jang hơdoi, hơmet ming, chih tơlĕch lơ luơ̆t gĭt kăl; vang hơmet ăn ‘lơ̆ng ăn tơdrong pơgơ̆r pôk rơih bơngai tang măt Quốc hội păng bơngai tang măt Jơnŭm pơgơ̆r kon pơlei jơ̆p tơring.

Kơdră Quốc hội athei, tơ̆ hơnăp kơnh, 2 anih jang hơnơ̆ng jang hơdoi mă kơjăp mưh chih pơjing luơ̆t păng dăr lăng, hơtŏk hơnăp jang đơ̆ng Khul jang tơgŭm, dôm bơngai juăt jang, bơngai jang khoa hŏk mưh tơblang tơƀôh dôm tơdrong tơgŭm; atŭm hăm ‘nŏh, athei hơtŏk tơdrong ‘lơ̆ng mưh pơgơ̆r tơƀâp bơngai tăh hla đơ̆ng bơngai tang măt Quốc hội păng bơngai tang măt Jơnŭm pơgơ̆r kon pơlei jơ̆p tơring, pơm ‘lơ̆ng vă dôm nơ̆r pơkăp, nơ̆r hơngăh tơ̆ hơnăp bơngai tăh hla đei bơ̆ jang kiơ̆ tơ̆ yăn âu.

Pơma truh đon pơhnŏng bơ̆ jang lơ̆m sơnăm 2026 athei jang tŏk truh 2 kơsô̆, kiơ̆ ƀok Kơdră Quốc hội, 2 păh athei jang hơdoi vă chih tơlĕch dôm tơdrong tơgŭm, trong pơgơ̆r jang vă mŭk drăm, tơpôl gơ̆h tŏk pran ‘lơ̆ng, tơdrong sơđơ̆ng teh đak đei vei kơjăp, pơjing anih jang chinh trĭ rơgŏh ‘lơ̆ng, pran kơtang, hơtŏk tơdrong jang tơbôl, tang găn xa pơjĭp, pơm glăi, pơhuach kư̆ kă.