Khei năr ou ki, kon pơlei choh jang sa lơ̆m dêh char iung jang kơtang pơting dih băl jang sa, jang kiơ̆ khoa hŏk kih thuơ̆t, tơgoăt jang sa hơdoi kiơ̆ trong kơjăp ‘lơ̆ng; tơdrog jang “Kon pơlei choh jang sa pơting dih băl choh jang sa, pơm tơlĕch, tĕch mơdro hơgei” atŏk tơ iung kơtang, đei ƀôh lơ trong jang hơ iă, hơp tak xah, hơnih mơdro sa kơ yuơ kon pơlei choh jang sa chĕp kơ̆l. jăl jang truh ou kơnh, Khul sơkơ̆t hơdăh trong jang “Tơgoăt pôm nơ̆r ƀơ̆r đon-Hơtŏ hơnơ̆ng-Tơplih ‘nao-Tơchăr gơgei-Atŏk tơ iung”, akŏm tơ iung pơjing khul pran kơjăp, pơm hơtŏk kơtang kang ƀô̆ bơ̆ jang ‘lơ̆ng gơh hơgei, tơgŭm djru atŏk tơ iung choh jang sa rơgoh ‘lơ̆ng, jang kiơ̆ kmăi kmŏk hơgei; hơdrin pơjing đei tŏ sĕt hloh 102 hơnih khul jang hơdoi, 102 hơp tak xah păng pơgơ̆r lăm pơtho pơhrăm ăn dang 250.000 ‘nu bơngai lơ̆m khul, pơjing đei khul kon pơlei choh jang sa gơh hơgei, trŏ lăp ăn tơdrong atŏk tơ iung hle.