Lơ̆m pơgê năr 19/1, tơ̆ Hơnih tơm Hop akŏm Teh đak (Hà Nội), Hop akŏm tih kơdră tang măt lơ̆m teh đak ‘măng mă XIV kơ Đảng Cộng sản Việt Nam pơgơ̆r hop akŏm proh hơmet hơdrol. Hơdrol pơgơ̆r blŭng a ‘măng hop akom proh hơmet, rim kơdră tang măt vang năm Hop akŏm tih hlôi mơ̆t hơpong Pơsat Ƀok Hô, ming gơvang pơkao păng soh hlôt nhang tơ̆ Hơnih man tơbăt rim bơngai nuih mơng lôch dŏng teh đak. Pơđĭ khul Hop akŏm ‘măn mĭnh pơnĭt kuh ka hla bat ƀlŏk hơdơ̆r kơ Nhap Tổng Bí thư Nguyễn Phú Trọng hăm rim Kơdră Khul chĕp pơgơ̆r Trung ương Đảng jăl XIII hlôi hiong răm. Ƀok Trần Thanh Mẫn, Kơdră jang lơ̆m Hơnih tơm Chinh trĭ, Kơdră chĕp pơgơ̆r Kuô̆k hô̆i tang măt ăn rim Kơdră chĕp pơgơ̆r tơm dơnơm kơ Đảng, Teh đak pơm tơm pơgơ̆r hop akŏm proh hơmet hơdrol. Hop akŏm tih hlôi pơdrơ̆ng kiơ̆, drơ̆ng mĭnh nơ̆r kơtang Tơdrong jang hop akŏm proh hơmet hơdrol, Trong tơchơ̆t bơ̆ jang kơ Hop akom tih, Tơdrong jang kơ Hop akŏm tih păng Trong tơchơ̆t pôk rơih tơ̆ Hop aŏm tih kơdră tang măt ‘măng mă XIV kơ Đảng. Hop akŏm hlôi pôk rơih Khul kơdră chĕp pơgŏr đei 16 ‘nu kơdră jang lơ̆m Hơnih tơm Chinh trĭ; pôk rơih Khul bơ̆ jang Hla bơar đei 5 ‘nu păng Khul Dăr lăng hơlen jơhngơ̆m đon kơdră tang măt vang năm Hop akŏm tih đei 13 ‘nu. Hop akŏm tih hlôi pơdrơ̆ng kiơ̆ gơ̆h pơm kơdră tang măt hăm đĭ đăng 1.586 ‘nu đei krao akŏm vang năm Hop akŏm tih.