Hơdrol kơ ‘noh, lơ̆m năr brei (21/1), Hop akŏm tih hơnơ̆ng bơ̆ jang prăt năr tơ̆ Hnam hop akŏm tơm vă pơma dơnuh găh rim Hla bơar tơchơ̆t kăl Hop akŏm tih. Tơ̆ pơgê, hlôi đei 15 ‘nu kơdră tang măt iung pơma găh rim khul kơdră tang măt, hơnih bơ̆ jang tơgop nơ̆r. Tơ̆ kơsơ̆, đei 15 ‘nu kơdră tang măt, hơnih jang iung pơma tơgop nơ̆r. Rim nơ̆r tơgop akŏm lơ̆m dôm tơdrong tơm kơ Hla bơar tơchơ̆t păng rim tơdrong kăl đei kon pơlei, kang ƀô̆, đang viên lăng truh. Jơ ‘năr pơma dơnuh tơpăt ‘lơ̆ng. Khul kơdră chĕp pơgơ̆r Hop akŏm tih tơgoăt iŏk, hôn bơnê kơtang dôm nơ̆r tơgop tôch tơpăt, trŏ lăp đơ̆ng rim bơngai tang măt; adoi pơrô̆ athei Hơnih jang pơm tơlĕch Hla bơar tơchơ̆t kăl dăr lăng hơlen, tơgoăt iŏk dôm nơ̆r tơgop vă pơm pơkeh trong vă pơjing Hla bơar tơchơ̆t kăl pơtruh ăn Hop akom tih pơdrơ̆ng nơ̆r. hăm dôm nơ̆r athei, Khul kơdră chĕp pơgơ̆r chih akŏm, pơtruh ăn Khul kơdră chĕp pơgơ̆r Trung ương Đảng jăl XIV lăng hơlen, hơmet pơ ‘lơ̆ng lơ̆m rim Tơdrong tơchơ̆t kăl, Tơdrong iung jang jang kiơ̆ Tơdrong tơchơ̆t păng pơm pơkeh dôm tơdrong lơ̆m Tơdrong tơchơ̆t Hop akŏm tih mă XIV kơ Đảng găh hơmet ming trong bơ̆ jang kơ Hop akŏm tih ‘măng mă XIV kơ Đảng. Hop akom tih pơdrơ̆ng nơ̆r drơ̆ng kiơ̆ pơtôch hrôih hloh 1 năr 1 poăt jơ ‘năr bơ̆ jang pơtêng hăm trong tơlĕch ăn ‘măng blŭng.