Pơma tơ̆ Hop akŏm, Kơdră Quốc hội Trần Thanh Mẫn pơma hơdăh, Tơdrong tơchơ̆t 57 tơlĕch ăn tơdrong hơgăt truh sơnăm 2030, Việt Nam găh grŭp 3 teh đak dơ̆ng hơdrol Đông Nam Á, grŭp 50 teh đak dơ̆ng hơdrol apŭng plĕnh teh găh tơdrong kĕ pơjei băl kơsô̆ păng kơsô̆ hơtŏk tơiung Khŭl kơdră teh đak điện tử. Truh sơnăm 2045, Việt Nam găh grŭp 30 teh đak dơ̆ng hơdrol apŭng plĕnh teh găh tơplih ‘nao pơcheh hơgei, tơplih kơsô̆; tơdrong hơgăt sơnăm 2030 jang mŭk drăm kơsô̆ gô đei hloh 30% GDP păng tŏk 50% lơ̆m sơnăm 2045.

Pơma hơdăh, hăm tơdrong hơdrin đơ̆ng pơđĭ khŭl jang chĭnh trĭ păng đĭ đăng kon pơlei, Việt Nam đei tơmam ‘lơ̆ng iŏk đei jơnei lơ̆m tơdrong jang âu, yua kơ tơdrong hơtŏk tơiung kơjăp kơ ŭnh hnam, tơpôl, yua kơ tơdrong oei đei đunh đai kơ teh đak păng hơdrĕch hơdrŭng, Kơdră Quốc hội lui ngeh akhan, hăm tơdrong hơdrin, nuih mơng, gơh hơgei păng đon pơ hnŏng, rim anih jang kơ Quốc hội gô iŏk đei dôm hơyak năm gĭt kăl lơ̆m tơdrong jang pơjing Quốc hội kơsô̆, tơgop ‘lơ̆ng lơ̆m tơdrong hơtŏk tơiung hrĕnh păng kơjăp kơ teh đak.