Pơih blŭng ‘măng pơma dơnuh, Hop akŏm hlôi mơ̆ng Đại tướng Phan Văn Giang, Bơngai jang lơ̆m Anih tơm Chĭnh trĭ, Kơdră tơm vei lăng Khŭl lĭnh, tơroi nơ̆r pơma dơnuh hăm hơnăn “Pơjing Khŭl lĭnh kon pơlei kach mang, chính quy, gơh hơgei, ‘nao, pơm tơdrong tơm pơjing khŭl lĭnh pran kơjăp, ‘nao, tơklep hăm tơdrong sơđơ̆ng kon pơlei”, păng Đại tướng Lương Tam Quang, Bơngai jang lơ̆m Anih tơm Chĭnh trĭ, Kơdră tơm vei lăng Kŏng an, pơma dơnuh hăm hơnăn “ Tơdrong jang kŏng an bơ̆jang kiơ̆ 3 tơdrong hơgăt gĭt kăl đơ̆ng Đảng: Rơngei, sơđơ̆ng - hơtŏk tơiung ‘lơ̆ng - hiôk hian đơ̆ng kon pơlei”.

Đang kơ ‘noh, lơ̆m ƀai pơma tơ̆ Hơnih hop akŏm tơm, Phŏ Thủ tướng Phạm Thị Thanh Trà, Đảng bộ Khŭl Kơdră teh đak pơma hơdăh jơhngơ̆m đon Khŭl kơdră teh đak pơcheh hơgei, hơtŏk tơiung, tơpăt păng bơ̆jang kơtang pơvih pơvăn ăn kon pơlei.

Lơ nơ̆r tơgop pơma hơdăh tơdrong hơnơ̆ng jang tŏk pran pơjing, hơmet tôm trong jang tơgŭm, tơlĕch ăn rim kon jên ăn hơtŏk tơiung; hơtŏk tơiung anih jang kăl hrơ̆ch ‘nao, pơm pơcheh hơnih hơtŏk tơiung ‘nao; tŭn pran klăih song kơchư̆k jang, chĕp kơ̆l pơgơ̆r tơklep hăm klăih song jên jang păng hơtŏk loi dơ̆ng dăr hơlen, dăr lăng hăm trong jang kăl “tơring tơchơ̆t, tơring jang, tơring pŭ hơnăp jang” mĭnh trong ‘lơ̆ng păng đei yua hloh.