Đơ̆ng blŭng sơnăm truh dang ei, rim hơnih jang kơ Hơnih chĕp pơgơ̆r Đảng dêh char Dak Lăk ling lang bơ̆ jang tơnăp. Đơ̆ng hơmet ăn dôm tơdrong jang, pơgơ̆r rim ‘măng hop akŏm truh sek tơlang rim tơdrong jei tĕnh koăng, adoi hoei kơ glăi. Kiơ̆ đơ̆ng mŏ Kim Thị Hoài Thương, bơngai joăt jang hơnih bơ̆ jang, tơdrong iung jang tĕnh koăng ou mĭnh păh vă pơchoh trong bơ̆ jang hơgrop jing mĭnh, hơmet ming khul jang, adoi jing trong pơkăp bơ̆ jang ‘lơ̆ng lơ̆m tơdrong jang rim khei:“Mưh bơ̆n hơlen lăng rim khei ‘noh jơ ‘năr bơ̆ jang tŏ sĕt kơna ƀôh hơdăh kiơ̆ rim tơdrong jang, mă kăl lơ̆m tơdrong đei glăi yă kiơ ‘noh gô ƀôh hloi păng hơmet tơtom ưh khan gô chang dĭng truh đĭ sơnăm mă tơƀôh hơdăh dôm tơdrong jang tim mă ‘lơ̆ng đơ̆ng noh mă tơlĕch trong jang hơmet pơ ‘lơ̆ng. Kiơ̆ kơ ĭnh tơdrong tơlĕch tơdrong pơkăp ou gô tơgŭm ăn rim bơngai ƀôh hơdăh tơtom, hơmet pơ ‘lơ̆ng tơtom păng hơlen hơdăh tơtom đơ̆ng noh jei pơm ăn trŏ lăp hloh.”

Ưh khan lăp pơdơ̆h ƀơ̆t tơdrong hơlen hơdăh kiơ̆ rim bơngai, tơdrong pơkăp ‘nao oei đei pơlăp hăm khul jang kơ rim hơnih bơ̆ jang. Yă Nguyễn Thị Hồng Thúy, Chánh Văn phòng Hơnih bơ̆ jang Đảng dêh char tơbăt akhan, ‘nou jing mĭnh trong jang hle, kăl đei rim kơdră chĕp pơgơ̆r tơdrong jang dăr lăng mă tơnăp tơdrong jang kơ rim bơngai lơ̆m khul, sơđơ̆ng ăn chă hơlen ƀlep bơ̆ jang ‘lơ̆ng păng tơdrong jang keh đang lơ liơ.“Lăp đơ̆ng rŏng tơchơ̆t tơlĕch jang kiơ̆ ‘noh jei hlôi pơtruh ăn rim kơdră chĕp pơgơ̆r tơdrong jang kơ yuơ ‘nou găh khul chĕp pơgơ̆r iŏk jang lăng hơlen tơdrong jang kơ rim bơngai lơ̆m hơnih jang. ‘Moi kiơ̆ hơlen ‘noh gô tơƀôh hơdăh tơdrong jang hlôi iung jang keh đang lơ̆m khei kơ bơngai Kơdră chĕp pơgơ̆r hơnih jang, đơ̆ng rŏng ‘noh lăng hơlen tơdrong jang keh đang kơ rim bơngai adoi nhen bơ̆ jang keh đang ‘lơ̆ng lơ liơ.”

Kiơ̆ đơ̆ng ƀok Nguyễn Thượng Hải, Kơdră chĕp pơgơ̆r Hơnih bơ̆ jang Đảng dêh char Dak Lăk, tơdrong hơlen hơdăh kang ƀô̆ kiơ̆ trong hle, jô̆ hơlen truh găh tơdrong jang, bơ̆ jang keh đang tơdrong jang, ưh khan lăp tơgŭm ăn vă ƀôh hơdăh păng pơtho pơhrăm ming tơdrong bơ̆ jang ăn rim bơngai mă oei tơgop hơmet pơ ‘lơ̆ng dăh mă pơtho pơhrăm dơ̆ng ăn dôm bơngai bơ̆ jang tim mă ‘lơ̆ng, tim mă tơnăp.

Đơ̆ng rŏng pêng khei tơlĕch jang, tơdrong pơkăp ‘nao ‘măng mă blŭng hơnhăk đei hơ iă. Rim kang ƀô̆ lơ̆m hơnih bơ̆ jang hlôi iung jang hơnăp jang kơdih kơtang hloh dơ̆ng păng dă ƀiơ̆ đei tơdrong glăi lơ̆m pơchoh trong bơ̆ jang. Mă lei, kiơ̆ tơdrong chă hơlen đơ̆ng kơdră chĕp pơgơ̆r Hơnih bơ̆ jang Đảng dêh char, oei đei tơdrong lui yom dih băl, tim mă tơƀôh hơdăh dôm tơdrong jang tim mă lăp kơ bôl boăl. Kơ yuơ lơ loh, lơ̆m khei năr kơnh, hơnih ou gô hơnơ̆ng tơlĕch jang kiơ̆ kơtang, tơpăt, sơđơ̆ng ăn tơdrong tơƀôh hơdăh tơdrong jang ‘lơ̆ng kơnê̆ lơ liơ kơ rim bơngai kang ƀô̆.“Mă tơpă, ‘măng blŭng ‘nhŏng oh tim mă joăt, ƀôh bơ̆ jang kơhret dêh hnang păng đe ‘nhŏng oh tôch lăp đon, bơngai bu jang tơnăp ‘noh xơkơ̆t hơdăh bơngai ‘noh jang ‘lơ̆ng, bơngai ayơ jang tim mă gơ̆h tim mă tơnăp ‘noh tơƀôh hơdăh sư jang tim mă ‘lơ̆ng hloi. Sơ̆ bơ̆n chă hơlen ưh kơgan tơpăt, tơdrong jang ayơ jei ‘lơ̆ng ngăl, dôm bơngai jang gơ̆h tơnăp đe sư ưh kơ lăp đon, kơ yuơ bơngai mă to bơ̆ jang ưh tơnăp nhen bơ̆n mă lei akhan sư jei tơnăp nhen bơ̆n mơ̆n, kơna trong pơkăp ou ‘nhŏng oh tôch lăp đon păng đơ̆ng noh lơ̆m hơnih bơ̆ jang rơih đei dôm ‘nhŏng oh jang gơ̆h, tơnăp hloh.”

Tơdrong tơplih ‘nao bơ̆ jang hơlen hơdăh kang ƀô̆ tơ̆ Hơnih bơ̆ jang Đảng dêh char Dak Lăk hlôi păng tŏk bŏk hơnhăk đei hơ iă, pơjing đei jơhngơ̆m pran vă rim kang ƀô̆ vang kơrŭn jơhngơ̆m păng atŏk kơtang bơ̆ jang ‘lơ̆ng hloh dơ̆ng. Tơdăh đei tơlĕch jang kiơ̆ ‘lơ ‘lŏ, tơpăt, trong jang pu gô đei lang să jang kiơ̆ tơ̆ rim hơnih bơ̆ jang anai lơ̆m dêh char, tơgop pơm hơtŏk bơ̆ jang ‘lơ̆ng kơ khul kang ƀô̆, bơ̆ jang ‘lơ̆ng hloh dơ̆ng ăn tơdrong bơ̆ jang tơ iung pơjing Đảng păng khul chinh trĭ.