Tơ̆ Hơnih tơm Hà Nội, đơ̆ng lơ̆m dôm khei blŭng tơlĕch jang kiơ̆ Tơdrong tơchơ̆t Hop akom tih XVIII Đảng ƀô̆ pơlei tơm jăl jang 2025–2030, lơ tơdrong tơchơ̆t tih tên đei tơlĕch jang kiơ̆ ‘lơ̆ng hăm dôm tơdrong jang ming man, tơdrong vă jang kăl. Ƀar tơdrong vă jang kăl hloh, ‘noh Trong tơm tơmang pơhiơ̆ kiơ̆ thoong đak kroong Hồng păng Hơnih kơdrơ̆m đă ƀŏng lŏng tơplŏng kơdou Olympic đei hơmŏ pơjing đei hơyak pran atŏk tơ iung, pơ̆ih trong ăn “Tơdrong hơ iă gĭt kăl đak kroong Hồng” lơ̆m hơnô̆ hơnăp kơnh. Kơdră jang lơ̆m Khul kơdră Hơnih tơm Chinh trĭ, Ƀĭ thư Đảng pơlei tơm Hà Nội Nguyễn Duy Ngọc tơbăt:“‘Nou jĭ 2 tơdrong vă jang gĭt kăl hloh, tơgop atŏk tơ iung Hơnih tơm, tơring tơmăn đak kroong Hồng păng lơ̆m teh đak, lăng truh pơjing đei tơdrong gĭt kăl kơ đak kroong Hồng, pơvih pơvăn ăn trong tơlĕch jang tŏk mŭk drăm GRDP đơ̆ng 11 % năm tơ̆ lơ lơ̆m sơnăm hloi păng pơđĭ lơ̆m jăl jang, pơjing đei tơplih ‘nao kơ Hơnih tơm Hà Nội, ‘lơ̆ng rŏ hơmŏ nhen, oei sa ‘lơ̆ng, tơchăr hơgei, atŏk tơ iung jing trong tơm ‘lơ̆ng rŏ hloh, gơh hơgei, tơƀưh dih băl lơ̆m plei teh”

Ưh khan lăp Hà Nội, pơđĭ lơ̆m teh đak, lơ tơring tŏk bŏk tơlĕch jang rim tơdrong vă jang trong hnam kăl, đơ̆ng trong nơnăm, tơring kơdrơ̆m, hơnih jang kmăi kmŏk gơh hơgei truh cham char, pơjing đei hơyak pran lang să ăn tŏk mŭk drăm kơtang. 

Lơ̆m khei ‘năr apŭng plĕnh teh tơplih kơtang, tơdrong jang mŭk drăm kơ Việt Nam hơnơ̆ng vei kơjăp sơđơ̆ng. Jăl jang 2021–2025, tŏk GDP jô̆ hơtŏ iŏk đei 6,3%, hơdrô̆ sơnăm 2025 iŏk đei 8,02%; tơdrong jang muk drăm tŏk 514 ti USD, dơ̆ng mă 32 lơ̆m apŭng plĕnh teh. GDP jô̆ hơtŏ măt bơngai iŏk đei lơ hloh 5.000 USD. Tơdrong tŏk jur đei vei kơjăp, rim tơdrong proh hơmet tih kơ tơdrong jang muk drăm đei sơđơ̆ng. Phó Giáo sư, Tiến sĩ Nguyễn Thường Lạng, Hnam trương Đại học Kinh tế quốc dân, akhan, dôm tơdrong iŏk đei jơnei ou jĭ tôch gĭt kăl:“‘Nou jĭ hơyak blŭng kơjăp ăn jăl atŏk tơ iung ‘nao, lơ̆m ou akŏm lơ̆m tơplih rơgoh ‘lơ̆ng, tơplih kơsô̆; pơ̆n kăt tơjur trong jang pơm hla bơar, atŏk gơh jang ăn hơnih mơdro sa vă pơjing đei atŏk kơtang mŭk drăm.”

Sơnăm 2025, lơ̆m teh đak đei vă jê̆ 300.000 hơnih mơdro sa đei pơjing 'nao păng vih hơlơk jang dơ̆ng; akŏp kon jên jang lơ̆m tơdrong jang mŭk drăm iŏk đei vă jê̆ 6 ti 400 triu hlak jên. Lơ̆m tơdrong jang FDI hơnơ̆ng jing hơnih jang kăl hloh, hăm akŏp kon jên tơmơ̆t jang jăl jang 2021–2025 iŏk đei hloh 158 ti USD, tơƀôh hơdăh tơdrong hơ iă lơ̆m tơmơ̆t jên jang Việt Nam.

Yak mơ̆t lơ̆m jăl jang 2026-2030, trong tơlĕch jang tŏk GDP jô̆ hơtŏ đơ̆ng 10% lơ̆m sơnăm năm tơ̆ lơ đei sơkơ̆t hơdăh. Rim tơdrong vă jang tơm nhen trong gre rĕnh Tu-Pơbăh, kmăi kmŏk kơsô̆, mŭk drăm kơsô̆, kmăi kmŏk pơm tơlĕch tơmam drăm “Make in Vietnam”, atŭm hăm ‘noh jĭ hơnih jang joh ayŏ, tơmang pơhiơ̆ ... gô pơih đei trong atŏk tơ iung ‘nao kơ teh đak. Bơngai joăt hơlen mŭk drăm Tiến sỹ Lê Duy Bình akhan: “Tơdrong pơm tơm kơdih, kơrŭn đĭ ai mă blŭng đei tơƀôh hơdăh lơ̆m sơđơ̆ng mŭk drăm, lơ̆m tơdrong kĕ jang găh bơ̆ jang jên hu păng pơm hơtŏk hơnih dơ̆ng kơ tơdrong jang mŭk drăm Việt Nam lơ̆m vang mơ̆t hơdoi apŭng plĕnh teh.”

Atŭm hăm tŏk mŭk drăm, rim hơyak kăl găh trong bơ̆ jang, tơdrong tơchơ̆t păng khul jang tơlĕch jang kiơ̆ hrơ̆p mĭnh ‘măng. ‘Măng hop akŏm Kuôk hô̆i jăl XV đei hơlen hơdăh ‘noh ‘măng hop akŏm gĭt kăl hloh lơ̆m chăl sơnăm, hăm lơ khôi luơ̆t, tơdrong tơchơ̆t hơmet pơ ‘lơ̆ng rim trong tơchơ̆t tơhlăk tơhlĭn, pơm pơ ‘noăih khul jang, tơplih kơtang trong chĕp pơgơ̆r jing trong pơjing atŏk tơ iung, pơtôch hloi tơdrong veh ver, tơpŭ dih băl hơnăp jang. Hăm trong kơjăp ‘lơ̆ng hlôi đei pơjing, Giáo sư, Tiến sỹ Phan Xuân Sơn, Kơdră chĕp pơgơ̆r Hơnih tơm Chă tơchĕng hơlen Khul kơdră chĕp pơgơ̆r, lui akhan:“Ba ling lang lui kơjăp lơ̆m tơdrong jang kơ hơdrĕch hơdrung păng lui kơjăp lơ̆m trong chĕp pơgơ̆r đơ̆ng Đảng păng hơdrĕch hơdrun bơ̆n đei jơhngơ̆m đon nuih, mĭnh jơhngơ̆m đon đei lăng jĭ nuih mơng pran kơtang, tơchăr hơgei, hơdrin yak hloh tơnap tap lơ̆m chăl hle. Dang ei yak mơ̆t lơ̆m chăl ‘nao, bơ̆n jei kiơ̆ yok rok jơ̆ng jơhngơ̆m đon ou păng Đảng ‘noh kon hơ ‘lơ̆p tơm dơnơm kơ hơdrĕch hơdrung. Dang ei Hop akom tih mă 14 kơ Đảng ‘noh trong tơlĕch ăn tơ iung pơjing mĭnh Đảng ‘noh ‘ngoăih dôm trong so ‘noh đei gơh hơgei, jơhngơ̆m đon ‘lơ̆ng ‘noh gô ba hơdrech hơdrung Việt Nam yak truh gơh hơgei oei sa ‘lơ̆ng nhen rim hơdrung oei sa gơh hơgei anai lơ̆m apŭng plĕnh teh”.

Hăm jơhngơ̆m đon lui kơjăp lơ̆m trong chĕp pơgơ̆r đơ̆ng Đảng, hăm hơmŏ ‘meh vă tŏk tơ iung kơ hơdrĕch hơdrung, kơ yuơ minh teh đak Việt Nam pơdrŏng, hơnŭk hơnoa, hơtŏ hăm rim teh đak pơdrŏng pran kơtang apŭng plĕnh teh, đang viên, kon pơlei lơ̆m teh đak lui akhan, hăm dôm tơdrong jang hlôi iŏk đei jơnei, hăm jơhngơ̆m đon hơdrin, pơ̆n, atŭm hăm jơhngơ̆m đon ‘meh vă tơplih ‘nao păng iung jang kơtang, teh đak bơ̆n gô tơgĕch jang kiơ̆ dôm tơdrong jơnei lơ̆m jơ rơvơn, yak hloh tơdrong long, iung jang kiơ̆ ‘lơ̆ng kơjăp trong tơlĕch jang atŏk tơ iung tĕnh koăng păng kơjăp ‘lơ̆ng.