Đơ̆ng rŏng mĭnh poăt khei đơ̆ng Tuy Hòa năm tơ̆ Buôn Ma Thuột iŏk tơdrong bơ̆ jang tơ̆ Hơnih đoàn dêh char Dak Lăk, mŏ Nguyễn Thị Như hlôi tĕnh koăng đei hơnih oei sơđơ̆ng, tơchă rơih hnam trương hŏk ăn kon hơ ‘lơ̆p păng proh hơmet tôm hơnih oei sa. Mă đơ̆ng pơjoăl hăm lơ tơdrong bơ̆ jang tơ̆ tơring ‘nao, mă lei đei bôl boăl, khul jang vang tơgŭm djru kơna mŏ Như hoei tơƀơ̆p lơ tơdrong tơhlăk tơhlĭn.“Ƀơ̆t măt gô đei tơdrong mă iung jang, tơdrong bơ̆ jang tôch kơ lơ, tŏk lơ dơ̆ng tơdrong bơ̆ jang. Tơdrong jang ‘ngoăih jơ bơ̆jang tơm, jang lơ̆m năr hơtuch giĕng rŏ năng truh ou kơnh gô gleh hrat hloh dơ̆ng. Tơ̆ hơnih bơ̆ jang so đei ƀok yă vang tơgŭm ăn, dang ei năm bơ̆jang tơ̆ hơnih hle ‘noh klo hơkăn nhi gô hơdrin proh hơmet mă ‘lơ̆ng vă sơđơ̆ng jơhngơ̆m bơ̆ jang keh đang”.

Jei vang iung năm truh tơ̆ tơring ‘nao iŏk tơdrong jang, mŏ Nguyễn Thị Thanh Huyền, bơ̆ jang lơ̆m Hơnih jang Pơtho tơbăt păng Pơrô̆ pơrôp kơ Hơnih Đảng dêh char Dak Lăk tơbăt, mŏ hăm 25 ‘nu kang ƀô̆ ‘nao truh hlôi sơng iŏk đei tơdrong lăng tông nông gia kơ jăp đơ̆ng rim bôl boăl lơ̆m hơnih bơ̆ jang.“Đơ̆ng Khul kơdră chĕp pơgơ̆r hơnih jang păng rim ‘nhŏng pơmai oh jei vang tơchă ăn hnam oei, tơchă hnam trương ăn kôn mon kon hơ ‘lơ̆p, đơ̆ng dôm tơdrong iĕ nhen tơbăt ăn kơchơ dăh mă tơbăt ăn hơnih sŏng sa, năm jang jei tơgŭm djru tôch brĕ. Ba ƀôh tơdrong tơgoăt mĭnh ƀơ̆r đon, tơklep dih băl nhen lĕ ‘nhŏng oh pôm hnam đĕch, vă khul kang ƀô̆ đơ̆ng Phú Yên so năm tơ̆ Dak Lăk ‘nao sơđơ̆ng jơhngơ̆m bơ̆ jang păng plang ăn jơhngơ̆m đon ăn dêh char Dak Lăk ‘nao tơpă atŏk tơ iung kơtang”.

Lăp đơ̆ng rŏng hơgrop, vă jê̆ 700 ‘nu kang ƀô̆, bơngai jang đơ̆ng Phú Yên hlôi truh bơ̆jang tơ̆ Hơnih bơ̆ jang tơm kơ dêh char Dak Lăk ‘nao. Mă đơ̆ng tơplih tơring hơrih sa, tơdrong bơ̆ jang dăh mă tơring oei sa, hơdrin pơm joăt, vang mơ̆t hơdoi păng plang jơhngơ̆m đon.

Mŏ H Như, bơ̆ jang tơ̆ Hơnih Jŏh ayŏ kơdŏ soang Sao Biển akhan, đei jơhngơ̆m đon hưch hanh hăm tơdrong jang păng ‘mêm kơ eng dih băl lơ̆m khul, ‘noh mă đơ̆ng jang tơ̆ yơ jei rơvơn ngăl.“Hăm ba mă tơ̆ yơ jei oei sa gơh ngăl, mă kăl ‘noh ba oei sa lơ liơ, ‘mêm kơ eng dih băl lơ liơ păng tơgŭm djru dih băl lơ̆m tơdrong hơrih sa”.

Găh mŏ Đỗ Anh Thư, kang ƀô̆ Hơnih vei răk mŭk drăm gĭt kăl Phú Yên chơt hơ iă tơroi:“Dang ei mơ̆t atŭm hăm Dak Lăk ‘noh ưh kơ jor ba kăl hơdrin hloh dơ̆ng, ba đei jing kon pơlei kơ dêh char Dak Lăk. Chă hơlen hơdăh dôm tơdrong ou to lơ̆m tơring vă bơ̆ jang ‘lơ̆ng hloh dơ̆ng, dôm tơdrong oei sa joăt joe ou to pă đei khan tơring ou tơring to bơih”.

Iung yak pơm joăt hăm dôm tơdrong bơ̆ jang ‘nao kăl đei jơhngơ̆m đon hơdrin đĭ ai đơ̆ng rim kang ƀô̆, bơngai jang. Dôm tơdrong chă tơgŭm djru tơtom đơ̆ng rim bơngai lơ̆m khul jang păng hơnih jang hlôi pơjing đei jơhngơ̆m đon tơklep dih băl kơjăp lơ̆m pơbŭng hnam atŭm-Dak Lăk. Mă đơ̆ng tơring, hơnih ayơ truh, đĭ đăng jei tŏk bŏk atŭm dih băl lăng truh mĭnh trong atŭm: atŏk tơ iung pơlei pơla sơđơ̆ng dơ̆ng kơjăp iăp kơtang.