‘Nao âu, dêh char Đắk Lắk pơgơ̆r Hop akŏm tơklep tour păng hơtŏk tơiung hơnih truh chă tơmang lăng vă hơlen lăng tơmam, tơdrong đei yua păng tơdrong yan âu đơ̆ng anih jang chă tơmang lăng tơring; hơdai hăm pơm akŏm pơma dơnuh vă dôm bơngai joăt jang, bơngai vei lăng păng mơdro sa vang tơroi băl, tơlĕch trong jang hơtŏk tơiung chă tơmang lăng kơjăp, hơtŏk ‘lơ̆ng tơdrong kĕ pơjei, tơgop bơ̆jang kiơ̆ tơdrong hơgăt jang tŏk mŭk drăm 2 kơsô̆ jăl jang 2026 – 2030.

Tơ̆ hop akŏm, lơ bơngai joăt jang păng anih mơdro sa hơlen lăng tơdrong tơmơ̆t hơdai hơnih hơtŏk tơiung đơ̆ng Tây Nguyên păng tơ ter đak dơsĭ hlôi pơih ăn tơdrong hiôk tih ăn tơdrong jang chă tơmang lăng Đắk Lắk. Đơ̆ng 1 hơnih truh đe ư hơnhang hăm cheh phe, tôn chĭng chêng, pơlei pơla, dơnâu đak Lắk, Buôn Đôn păng cham char bri brăh ‘lơ̆ng hơiă, Đắk Lắk dang ei oei đei tơmơ̆t dơ̆ng dôm tơdrong ‘lơ̆ng ‘nao đơ̆ng đak dơsĭ, ving, tơmo tơgol kŭm hăm dôm kơjă kăp gĭt joh ayŏ păng tơmam sa tơring tơter đak dơsĭ.

Tơdrong tơklep hơdai đơ̆ng đak dơsĭ păng bri kông đei lăng jĭ trong năm đei lơ tơmam ‘lơ̆ng vă pơjing dôm tơmam chă tơmang lăng hơdai tơring pra ra băl, pơdui đunh jơ năr ƀĭch oei păng hơtŏk tơdrong chă lăng vă kơbăt ăn tơmoi. Mă lei, kiơ̆ kơ dôm bơngai joăt jang, tơdrong đei yua lăp tơpă hơtŏk đei yua mưh đei tơplih jing dôm tơmam chă tơmang lăng hơiă, đei tơdrong pơjei băl lơ. Ƀok Nguyễn Hữu Y Yên, Kơdră Jơnŭm jang hơdai Kŏng ti Pơvih pơvăn chă tơmang lăng Saigontourist akhan:

“Đơ̆ng rŏng kơ trong gre kơdâu hrĕnh tơƀưh pơlei tơm Hồ Chí Minh truh Tuy Hòa kơđeh pă 7 jơ. Pơm liơ vă Tuy Hòa đei dôm tơdrong jang mă hơiă, mă ‘lơ̆ng. ‘Ngoăih kơ tơdrong hum ngôi đak dơsĭ nhen hrei ‘nâu ‘noh bơ̆n kăl kơ tơmơ̆t jên jang pơm dơ̆ng dôm hơnih ngôi pơchơt tih ‘noh tơmoi mă truh ngôi tơ̆ Tuy Hòa.”

Hơdai hăm dôm tơdrong đei yua ‘nao, dôm bơngai tang măt kŭm tơƀôh ăn lơ tơdrong tơhlăk pơgăn tơdrong hơtŏk tơiung kơ anih jang chă tơmang lăng nhen trong nơnăm tam mă hơtŏ băl, tơdrong pơvih pơvăn tam mă tơgăl hăm tơmam ‘lơ̆ng, tơdrong pơtrŭt roi tơƀôh oei tam mă ‘lơ̆ng păng tơdrong iŏk yua kơmăy kơsô̆ tam mă pơm lăp hăm ‘meh vă hơtŏk tơiung lơ̆m khei ‘năr ‘nao. Lơ nơ̆r tơgop athei dêh char kăl kơ đei trong jang tơgŭm hơdrô̆ vă sơng đei tơmơ̆t jên jang lơ̆m anih jang chă tơmang lăng, tơgŭm anih mơdro sa pơjing tơmam ‘nao păng pơih să dôm trong chă tơmang lăng hơdai.

Lơ̆m trong jang hơtŏk tơiung chă tơmang lăng rơgoh, hơgei păng kơjăp, Đắk Lắk đei hơmĕng gô tơgĕch iŏk yua hơnih hơtŏk tơiung ‘nao vă pơjing dôm tơmam ‘lơ̆ng hơdrô̆, tơgop pơm hơtŏk ‘lơ̆ng anih truh lơ̆m hla kak chă tơmang lăng teh đak. Chih iŏk dôm nơ̆r tơgop tơ̆ hop akŏm, ƀok Đào Mỹ, Phŏ Kơdră Anih vei lăng kon pơlei dêh char Đắk Lắk tơbăt tơring gô akŏm tơlĕch dôm trong jang tơm vă tơgŭm anih mơdro sa păng hơtŏk tơiung anih năm truh.

“Pơjing hla kak hơnih truh đơ̆ng chă tơmang lăng ‘noh jĭ mă mônh. Mă 2 dơ̆ng ‘noh jĭ đei trong jang tơgŭm pơih tour, vă pơjing hơnih truh. Jang đei thoi noh ‘noh anih mơdro sa mă sơđơ̆ng jơhngơ̆m lui ngeh lơ̆m pơih tour, pơjing hơnih truh vă sơng đei tơmoi chă tơmang lăng”.

Ưh khan lăp pơdơh tơ̆ dôm trong pơjing jang gĭt kăl, hop akŏm oei chih iŏk dôm hơyak năm hơdăh vă pơtrŭt jang hơdai hơtŏk tơiung chă tơmang lăng. Anih vei lăng găh Joh ayŏ, Tơplŏng kơdâu păng Chă tơmang lăng dêh char Đắk Lắk hlôi kĭ pơkăp tơdrong jang hơdai hăm 1,2 anih mơdro sa chă tơmang lăng; hơdai hăm dôm anih mơdro sa chă tơmang lăng, hơnih ƀĭch pơdơh, hơnih chă tơmang lăng, hơnih tĕch mơdro tơmam et sa păng hơnih gre chơ chuĕn kŭm kĭ pơkăp dôm tơdrong drơ̆ng nơ̆r jang hơdai, tơlĕch jang tơdrong jang tơgŭm găh kơjă păng hơtŏk ‘lơ̆ng pơvih pơvăn vă pơtrŭt chă tơmang lăng.

Trong jang hơdai tơring kŭm tŏk bŏk đei lơ tơring tŭn pran. ‘Nao âu, Lâm Đồng păng Khánh Hòa kŭm hlôi pơgơ̆r tơdrong jang tơgoăt hơdai pơtrŭt tơmơ̆t jên jang, tĕch mơdro păng chă tơmang lăng sơnăm 2026, pơih să tơdrong hiôk jang hơdai đơ̆ng Tây Nguyên păng tơter đak dơsĭ Nam Trung Bộ. 2 tơring hlôi kĭ pơkăp 8 hla ar jang hơdai đơ̆ng dôm anih mơdro sa vă pơtrŭt tơmơ̆t jên jang, tĕch mơdro păng chă tơmang lăng. Ƀơ̆t mă  Khánh Hòa jĭ hơnih kơdrơ̆m mŭk drăm đak dơsĭ hăm anih jang, tơmam chă tơmang lăng hơtŏk tơiung, ‘noh Lâm Đồng đei yua ‘lơ̆ng găh tŏ ‘mi ‘kal, tơmang lăng bri brăh, pơdơh ngôi păng choh jang hăm kơmăy kơmŏk ‘nao. Tơdrong tơƀưh hơdai hăm dôm trong nơnăm tơm nhen Trong gre kơsô̆ 1, trong gre kơdâu hrĕnh Bắc – Nam, Trong gre kơsô̆ 27C, trong gre treng Bắc – Nam kŭm hăm hơnih tơnŏk đak dơsĭ păng gre păr tŏk bŏk pơm đei tơdrong ‘lơ̆ng hiôk vă pơjing dôm tơmam chă tơmang lăng, pơih să hơnih hơtŏk tơiung păng sơng đei tơmơ̆t jên jang.

Đơ̆ng bri kông truh đak dơsĭ rơgoh, tơdrong jang hơdai đơ̆ng dôm tơring Tây Nguyên păng tơter đak dơsĭ Nam Trung Bộ tŏk bŏk pơih ăn hơnih hơtŏk tơiung ‘nao ăn chă tơmang lăng. Mưh dôm tơdrong đei yua hơdrô̆ đei tơgoăt jing jơhngơ̆m pran hơdai, ‘nâu gô jing tơdrong ‘lơ̆ng gĭt kăl vă tơring jang tŏk, tơgop lơ̆m tơdrong jang yak tŏk kơ teh đak lơ̆m chăl ‘nao.