Hrei ou lơ̆m teh đak đei 733 hơnih jang chih kơtơ̆ng ang, tơjur 189 hơnih jang pơtêng hăm hơdrol, tơgop kơtang lơ̆m jang kiơ̆ trong bơ̆ jang pơm kơtei khul jang, atŏk kơtang jang ‘lơ̆ng. Tơ̆ jơ tơƀơ̆p muh măt, rim hơnih chih kơtơ̆ng ang apĭnh athei Khul kơdră chĕp pơgơ̆r Teh đka lăng kơjăp hloh dơ̆ng truh trong bơ̆ jang kăl, pơjing rơvơn pơm hơtŏk jang ‘lơ̆ng jang sa kơdih păng tơdrong ‘lơ̆ng bơ̆ jang. Hmach chơt hơ iă ăn khul chih kơtơ̆ng ang, Kơdră chep pơgơ̆r Kuô̆k hô̆i Trần Thanh Mẫn hôn bơnê dôm tơdrong tơgop gĭt kăl đơ̆ng khul chih kơtơ̆ng ang lơ̆m pơrô̆ tơbăt trong bơ̆ jang đơ̆ng Đảng, teh đak; chih tơbăt tơtom ‘măng iung jang kơtang proh hơmet khul bơ̆jang, pơtrŭt kơtang tŏk mŭk drăm. Hơnih chih kơtơ̆ng ang jei hơnơ̆ng vei kơjăp hơnăp jang kăl lơ̆m vei lăng năng tông trong bơ̆ jang đơ̆ng Đảng, iung tơjră phă pơrăm rim nơ̆r hơlĕnh pơdăr, tơ iung pơjing trong tơroi tơbăt tơpăt ‘lơ̆ng.