Năr (23/12), tơ̆ Đà Lạt, Hơnih jang vei lăng kon pơlei dêh char Lâm Đồng pơgơ̆r Hop akŏm sơkơ̆t Tơdrong jang kơ teh đak gah hơtŏk jang hơdoi păng hơvơn tơdrong tơgŭm đơ̆ng phi Chinh phuh teh đak đe jăl sơnăm 2019- 2025. Tơchơ̆t đơ̆ng Hơnih jang vei lăng kon pơlei dêh char Lâm Đồng ăn ƀôh, dôm tơdrong jang tơgŭm đơ̆ng dôm hơnih jang phi Chinh phuh teh đak đe hlôi tơgop hơtŏk mŭk drăm – tơpôl adoi nhen vei sơđơ̆ng tơdrong pơyua, sut lê̆ pơngot, tơjur hin dơnuh, vei lăng tơnăp tơdrong hơmet jĭ jăn, pơtho pơhrăm, hơtŏk hlôh vao ăn kon pơlei tơ̆ tơring tơlĕch jang, tơgop hơtŏk tơdrong hơrih ăn kon pơlei, mă kăl noh tơ̆ tơring kon pơlei kon kông, tơring jang mŭk drăm oei ƀơm lơ tơnap tap.

Lơ̆m hop akŏm, dêh char Lâm Đồng hlôi tơroi gah tơdrong hơvơn jên jang tơgŭm noh mă hơdrol. Kiơ̆ kơ noh, dôm tơdrong asong jang mă tơm gah pơgang hơmet jĭ jăn, choh jang xa, pơtho pơhrăm, dôm tơdrong đei ƀôh lơ̆m tơpôl... Dêh char tŏk bŏk oei chih Hơnăn dôm tơdrong vă jang hơvơn tơdrong tơgŭm jăl sơnăm 2026- 2030 atŭm hăm pơkăp vei lăng păng iŏk yua jên tơgŭm đơ̆ng hơnih jang teh đak đe; pơm trong ƀônh hiôk gah trong pơkăp tơgŭm jang, vă hơvơn rim hơnih jang phi chinh phuh teh đak đe tơmơ̆t pơm jang, tơlĕch dôm tơdrong jang tơ̆ dêh char kiơ̆ trong pơm kiơ̆ trŏ khôi luơ̆t Việt Nam păng dôm tơdrong pơkăp đơ̆ng tơring.