Kơsơ̆ ‘nâu (11/5), tơ̆ Hnam hôp teh đak Mỹ Đình, Hà Nội pơgơ̆r hôp hơmet ăn Hop akŏm bơngai tang măt lơ̆m teh đak kơ Mặt trận Tổ quốc Việt Nam ‘măng mă XI, jăl jang 2026-2031. Hăm hơnăn “Mât mĭnh ƀơ̆r đon – Kon pơlei pơm tơm – Tơplih ‘nao - Rơgei – Jang tŏk”, Hop akŏm đei pơgơ̆r đơ̆ng ‘năr 11 truh 13/5, jĭ tơdrong chinh trĭ, tơpôl gĭt kăl, pơih blŭng ăn jăl jang ‘nao kơ MTTQ Việt Nam ƀât mă dôm anih jang chinh trĭ, tơpôl păng dôm Khul kon pơlei yoa Đảng, Teh đak pơjao tơdrong jang hlôi mât lơ̆m MTTQ Việt Nam ngăl bơih.

Vang truh Hop akŏm đei hlŏh 1.300 ‘nu bơngai tang măt, lơ̆m noh đei 1.138 ‘nu bơngai tang măt tơpă, đei Kơdră jang lơ̆m Anih Trung ương MTTQ Việt Nam jăl X oei bơ̆ jang; bơngai tang măt yoa Hop akŏm MTTQ dôm dêh char, plt păng dôm anih jang rơih; bơngai tang măt đơ̆ng anih jang kơpal rơih; bơngai Việt Nam oei xa tơ̆ teh đak đe păng kăn ƀô̆ jang kơtă lơ̆m Mặt trận. Hla ar chih tơroi chinh trĭ vă ră roi lơ̆m Hop akŏm đei hơnăn: “Hơtŏk hơnăp jang tơm găh chinh trĭ đơ̆ng MTTQ Việt Nam vă tưk tơiung tơdrong pơm tơm đơ̆ng kon pơlei, tơdrong juăt ‘mêm kơ teh đak, jơhngâm pran đơ̆ng mât mĭnh ƀơ̆r đon, tơguăt đĭ đăng hơdrĕch hơdrung, pơjing teh đak jang tŏk pơdrŏng, hơnŭk hơnoa, gơ̆h hơgei, hiôk chơt”.

Tơ̆ jơ hôp hơmet kơsơ̆ ‘nâu, Hop akŏm akŏm pơma nuh, chă rơih Khul kơdră pơgơ̆r hop akŏm, Khul jang Thư ký; pơdrơ̆ng nơ̆r ăn tơdrong vă bơ̆ jang, tơroi rim tơdrong găh bơngai tang măt vang truh Hop akŏm; hơlen năng tơdrong jang đơ̆ng Anih Trung ương, Khul kơdră vei lăng păng Khul chĕp kơ̆l pơgơ̆r Anih Trung ương MTTQ Việt Nam đơ̆ng 2024-2026; hơlen năng hla ar chih tơroi găh tơdrong hơmet ming, chih tơlĕch dơ̆ng 1,2 Tơdrong hơgăt kơ Anih MTTQ Việt Nam.