Jơnŭm kơchơ akŏm hloh 250 hơdrơ̆r tơmam drăm đơ̆ng 100 hơnih mơdro sa, hơp tak xah, hơnih pơm tơlĕch kơ 16 dêh char, pơlei tơm lơ̆m teh đak, pơdă tơƀôh rim tơmam drăm OCOP, tơmam drăm kmăi kmŏk pơm tơlĕch ‘lơ̆ng, tơmam drăm ‘lơ̆ng rim tơring păng hơnih chă răt sa ‘nhĕm ‘nhot Tây Nguyên. ‘Nou jĭ tơdrong pơgơ̆r pơtrŭt mơdro sa kăl lơ̆m hơtuch sơnăm, pơjing đei trong tơgoăt dih băl mơdro sa, tơƀôh tơbăt tơmam drăm kăl păng tơgum djru hơnih mơdro sa pơih să hơnih tĕch răt. Yă Đỗ Thị Thu An, Kơdră chĕp pơgơ̆r Hơnih vei lăng Mơdro sa dêh char Dak Lăk tơbăt, jơnŭm kơchơ hlôi rơ̆ih, hơlen đơ̆ng tơring. Rim hơnih vang năm ưh khan lăp lăng kơjăp tơmam drăm ‘lơ̆ng mă oei tơlĕch đei kơjă trŏ lăp, trŏ lăp ăn tơdrong ‘meh vă răt yoa đơ̆ng kon pơlei, mă kăl lơ̆m jơ ‘năr Têt Nguyên vă jê̆ truh.