Tơpă tơ̆ yăn âu dôm bơngai tang măt pơma hơdăh akhan jang tŏk lơ̆m sơnăm 2025 đơ̆ng dêh char Đắk Lắk lăp đei 6,68%, tŏ sĕt hlŏh kơsô̆ đei tơlĕch. Kơplăh ‘nŏh, đon pơhnŏng jang tŏk đơ̆ng 10% tŏk tơ̆ kơpal sơnăm 2026 kiơ̆ trong tơlĕch đơ̆ng Trung ương păng Tơdrong tơchơ̆t đơ̆ng Hop akŏm Đảng ƀô̆ dêh char ‘nŏh jĭ tơdrong tôch pơmat. 

Kiơ̆ ƀok Trần Văn Tân, Kơdră Anih vei lăng jên hu dêh char Đắk Lắk vă jang đei tơdrong ‘nâu, dêh char tơlĕch trong jang tŏk pran găh kơmăy kơmŏk, ming man păng pơvih pơvăn, năng tơdrong tơmât jên jang đơ̆ng teh đak păng jên jang lơ̆m tơpôl jĭ 2 tơdrong tơm: “Găh anih jang kơmăy kơmŏk, ming man, hơnơ̆ng chih hơdăh jĭ jơhngâm pran vă jang tŏk tơm, hăm kơsô̆ tŏk truh 18,14%. Tơdrong tơmât jên jang đơ̆ng teh đak athei akŏm jơhngâm tơlĕch mă đĭ kiơ̆ trong jang đei tơproh, tơchĕng adrol kơsô̆ jên jang âu dang hlŏh 14.000 ti. ‘Ngoăih kơ ‘nŏh athei tơgĕch iŏk jên jang đơ̆ng dôm tơdrong jang mă Trung ương tơlĕch tơ̆ tơring hai. Hăm kơsô̆ jên jang đơ̆ng tơpôl, athei hơmet pơ ‘lơ̆ng dôm tơdrong pơmat tat, tơhlăk tăk, mă loi ‘nŏh lơ̆m tơdrong pơma hla ar vă tơlĕch jên jang ăn dôm tơdrong jang oei tơlĕch.”