‘Nou ‘măng hop akom blŭng a lăp đơ̆ng rŏng hơgrop pêng dêh char Dak Nông, Bình Thuận, Lâm Đồng jing dêh char Lâm Đồng hle. Tơbăt tơ̆ hop akom tơƀôh ăn, 6 khei blŭng sơnăm, dêh char Lâm Đồng hlôi iŏk đei jơnei hơ iă: GRDP tŏk vă jê̆ 6%, tĕch mơdro tŏk 7,9%, thuê̆ ăn hơnih mong jên bơ̆ jang teh đak đei hloh 16.800 ti hlak jên, tŏk 19%, tĕch mơdro tơ̆ teh đak đe iŏk đei hloh 1 ti 500 triu USD. Dêh char hlôi jang keh đang trong nơnăm kăl tơƀưh trong gre rĕnh Tu-Pơbăh păng jăl trong jih đak dơsĭ găh Pơbăh Phan Thiết, adoi jang keh đang Tơdrong jang xut xa hnam pơgia, hnam hnăt hnot. Iung pơma tơ̆ hop akŏm, Kơdră chĕp pơgơ̆r Jơnŭm vei lăng kon pơlei dêh char Trần Hồng Thái tơƀôh hơdăh lơ tơdrong tơnap tap kăl hơmet pơ ‘lơ̆ng lơ̆m khei năr kơnh nhen: tŏk mŭk drăm tim mă tơgăl hăm tơdrong đei, tơlĕch kon jên teh đak tơmơ̆t jang tŏ sĕt. ‘măng hop akom hlôi akŏm pơma dơnuh, tơchơ̆t rim tơdrong kăl găh kon jên bơ̆ jang, trong tơgŭm djru kang ƀô̆ đơ̆ng rŏng proh hơmet hơnih bơ̆ jang păng trong jang atŏk tơ iung mŭk drăm-tơpôl.