Hop akŏm jĭ tơdrong jang đei lơ̆m dôm tơdrong jang vă tơbăt dôm năr lêh tih kơ teh đak, ƀlep ƀât tơbăt 80 sơnăm Kăch mang khei 8 păng Quốc khánh 2/9. Iung pơma nơ̆r pơtho tơ̆ Hop akŏm, Phó Thủ tướng Nguyễn Hòa Bình pơma hơdăh: Hop akŏm jĭ jơnăr vă bơ̆n lăng dơ̆ng 1 jăl trong kơtang nuih mơng đơ̆ng hơdrĕch hơdrung, kŭm hăm băl hơiă hăm dôm tơdrong jơnei tih tên mă đĭ đăng Đảng, đĭ đăng kon pơlei păng đĭ đăng khul linh bơ̆n iŏk đei păng vang hue lăng truh tơdrong arih xa ning mônh kơnh ‘lơ̆ng hơiă kơ teh đak.

Iŏk đơ̆ng Kăch mang Khei 8 sơnăm 1945, jơhnơr arih oei chih pơ ‘yoi dơ̆ng dôm tơdrong ‘lơ̆ng hơiă. Chăl chĕp kơ̆l pơgơ̆r kơdih, rơngei hiôk hian đei tơtrơp dơ̆ng hăm tơdrong pơjing đei 1 teh đak kơjăp ‘lơ̆ng, rơngei hiôk hian, jang tŏk pran păng gô hơnơ̆ng iung jang kiơ̆ chăl jang tŏk iung, hơnŭk hơnoa, pơdrŏng pran kơtang.