Kiơ̆ tơbăt, dêh char Dak Lăk hlôi jang keh đang bơ̆ jang hop akŏm ‘măng mă blŭng, drơ̆ng mĭnh nơ̆r tơbăt ăn 28 ‘nu bơngai chih hơnăn ăn pôk tơmơ̆t pơm Kơdră tang măt Kuô̆k hô̆i jăl XVI tơ̆ dêh char vă pôk rơih iŏk 15 ‘nu kơdră tang măt; tơbăt ăn 148 ‘nu bơngai chih hơnăn ăn pôk rơih jang lơ̆m Jơnŭm vei lăng kon pơlei dêh char vă pôk rơih đei 84 ‘nu bơngai tang măt, tơbăt ăn hloh 4.300 ‘nu bơngai vă pôk rơih iŏk đei 2.445 ‘nu bơngai tang măt Jơnŭm vei lăng kon pơlei tơring. Lăp đơ̆ng rŏng hop akŏm blŭng a, dêh char hơnơ̆ng iung jang kiơ̆ tơdrong hơmet ming trong proh hơmet trŏ lăp ăn tơdrong tang măt, hơtŏ hơnơ̆ng păng tơdrong gơh chă rơih mơ̆ng kơdih đơ̆ng bơngai tăh hla. Vă sơđơ̆ng chinh trĭ, sơđơ̆ng dơ̆ng kơjăp tơpôl, rim khul ƀô̆ đô̆i kŏng ang hlôi pơjing trong vă jang păng tơdrong jang hơdăh, iung jang hơdoi kơjăp; tơdrong sơng iŏk hô sơ chih hơnăn ăn pôk rơih păng dôm tơdrong jang đei ƀơm truh đei iung jang ‘lơ̆ng hơ iă, trŏ ƀlep hăm tơdrong tơchơ̆t. Khul dăr lăng hôn bơnê tơdrong hơmet ăn ‘lơ̆ng, tơnăp jang ‘lơ̆ng đơ̆ng chĕp pơgơ̆r Pôk rơih dêh char Dak Lăk; athei dêh char hơnơ̆ng atok kơtang bơ̆ jang ‘lơ̆ng vei lăng sơđơ̆ng chinh trĭ lơ̆m hơnih, jang keh đang rim trong jang vei lăng sơđơ̆ng dơ̆ng kơjăp tơpôl tơ̆ rim hơnih tăh hla; atŏk kơtang tơroi tơbăt vă bơngai tăh hla băt hơdăh dôm tơdrong ou to kơ bơngai chih hơnăn ăn pôk rơih, jang kiơ̆ trong rơih trŏ ƀlep mưh năm tăh hla.