Tơ̆ âu, Bí thư Anih jang Đảng dêh char Lâm Đồng Y Thanh Hà Niê Kđăm gơih nơ̆r thơ thâu truh Ƀok soi Đỗ Mạnh Hùng kŭm hăm đe ƀok soi, yă giĕng păng đĭ đăng kon pơlei lui Kŏng yăo 1 pơyan Nô el sơđơ̆ng, hiôk chơt, ƀĕnh tơdrong ‘lơ̆ng đơ̆ng Kră yang păng 1 sơnăm ‘nao ‘lơ̆ng hơiă.

Bí thư Anih jang Đảng dêh char ‘meh vă tơ̆ hơnăp kơnh, Ƀok soi Đỗ Mạnh Hùng kŭm hăm đe ƀok soi, yă giĕng lơ̆m Hnam khop hơtŏk hơnăp jang, krao hơvơn kon pơlei lui Kŏng yăo hơkŭm pơhrăm sơđơ̆ng, hơnơ̆ng pơm kiơ̆ ‘lơ̆ng dôm trong jang tơgŭm đơ̆ng Đảng, khôi luơ̆t đơ̆ng Teh đak; bơ̆jang kiơ̆ ‘lơ̆ng trong năm lui kơ kră yang, ‘mêm kơ teh đak, hơrih sa ‘lơ̆ng, lui kơ jăp, hơtŏk jơhngơ̆m đon “bơngai Kŏng yăo ‘lơ̆ng ‘noh kon pơlei ‘lơ̆ng”. Hơdai hăm pơvei tơdrong pơvei ‘lơ̆ng hơiă, lăp hiôk, hơdrin pơma dơnuh, tơklep hơdai hăm rim kơdră, rim anih jang kơ dêh char Lâm Đồng.