Kơsơ̆ 28/12, tơ̆ xăh Ia Dom (dêh char Gia Lai), Binh đoàn 15 (Anih tơm vei lăng khul linh teh đak) pơm lêh Man rông ăn xăh Ia Dom. ‘Nâu jĭ tơdrong jang man rông mă 9 ăn kon pơlei tơ̆ dôm xăh sơlam găh Pơmât kơ 2 dêh char Gia Lai păng Quảng Ngãi. Kiơ̆ trong jang, 9 tŏ rông đei man hăm kơsô̆ jên 20 ti. 1 pôm rông xă dang 130m², kơjung 17m. Dôm tŏ rông đei man kiơ̆ rông so, lăp hăm tơdrong juăt, jŏh ayŏ kơ dŏ xoang đơ̆ng kon pơlei kon kông tơ̆ tơring sơlam Gia Lai păng Quảng Ngãi. Tơchĕng adrol, đĭ đăng 9 tŏ rông gô man đang păng tơmât yoa lơ̆m khei 9/2026.

Pơma tơ̆ lêh tơlĕch man, Thượng tướng Trương Thiên Tô, Kơdră jang Chinh trĭ kơ Khul linh kon pơlei Việt Nam ăn tơbăt: tơdrong tơmât jên jang man rông tơ̆ dôm xăh sơlam Tây Nguyên tơƀôh hơdăh đon pơngơ̆t đơ̆ng Đảng, teh đak păng khul linh hăm kon pơlei kon kông, vă hơmet kơjăp tơdrong pơvei, tơguăt đĭ đăng hơdrĕch hơdrung, pơjing đon lui kơjăp ăn kon pơlei, tơklep hăm tơdrong jang vei sơđơ̆ng chinh trĭ, vei lăng kơjăp ‘lơ̆ng teh đak tơ̆ tơring.