Roi tơbăt tơ̆ jơ bơ̆jang ăn ƀôh, Đắk Lắk tŏk bŏk tơƀơ̆p dôm tơdrong pơmat tat lơ̆m tơdrong hơmet ăn, klăih song păng tơlĕch jên jang ăn kơ rim tơdrong jang tơm kơ teh đak. 1,2 tơdrong jang tơlĕch jang hiơ̆ yua đơ̆ng tơhlăk tơhlĭn ƀơ̆t khei ‘năr âu trung ương oei tam mă pơjao jên păng jô̆ hơlen jên hơdrol tơdrong jang sơnăm 2025 ăn tơring.

Tơ̆ jơ bơ̆jang, dôm bơngai tang măt kŭm apĭnh dôm tơdrong ƀơm truh tơdrong jang choh jang sa păng cham char nhen tơdrong vei lăng, iŏk yua teh choh jang sa, mir đak lar; ưh kơ ‘lơ̆ng đơ̆ng tơdrong hơgăt đơ̆ng Luơ̆t Bri ‘long, Luơ̆t teh găh thuê bri, hơlen lăng kơjă bri... Tơdrong pơm hla ar kiơ̆ trong tơlĕch jang tơmơ̆t jên jang, pơdơh pơm hla ar jang hơdai bơ̆jang tơdrong jang hơtŏk tơiung hnam oei; tơdrong jang tơgŭm asong tŏk iŏk jên hăm ŭnh hnam dơnuh hin, ŭnh hnam ‘nao klăih đơ̆ng dơnuh hin tŏk iŏk tơgŭm găh teh oei, hnam oei, teh choh jang sa, tơplih tơdrong jang.