‘Năr (24/9), Khŭl tang măt Quốc hội dêh char Lâm Đồng bơ̆jang kiơ̆ tơƀơ̆p pơma dơnuh hăm bơngai tăh hla ‘moi kiơ̆ trong tơƀơ̆p kơtă tơ̆ Hơnih hop akŏm tơm kơ Anih jang Đảng dêh char tơ̆ Đà Lạt păng trực tuyến truh 37 hơnih pơdăh tivi lơ̆m dêh char hăm hloh 2.000 ‘nu bơngai tăh hla rim xăh, phường vang akŏm. Tơ̆ jơ tơƀơ̆p pơma dơnuh, Khŭl roi tơbăt: ‘Măng hop akŏm mă 10, Quốc hội jăl XV tơchĕng hơdrol vă pơgơ̆r đơ̆ng ‘năr 20/10 truh ‘năr 12/12 Quốc hội gô set hơlen, tơchơ̆t 43 luơ̆t, tơdrong chơ̆t; 12 grŭp tơdrong găh mŭk drăm - tơpôl păng dôm tơdrong gĭt kăl nai.... Bơngai tăh hla dêh char Lâm Đồng tơƀôh lui ngeh lơ̆m tơdrong chĕp kơ̆l đơ̆ng Đảng, dăr hơlen đơ̆ng Quốc hội, tơdrong pơgơ̆r kơtang đơ̆ng Khŭl kơdră teh đak lơ̆m hơtŏk tơiung mŭk drăm - tơpôl, vei sơđơ̆ng khŭl lĭnh sơđơ̆ng kơ teh đak.

Bơngai tăh hla athei kăl kơ bơ̆jang hrĕnh athei đơ̆ng Anih tơm Chĭnh trĭ dăr hơlen bơ̆jang kiơ̆ tơdrong jang pơtho pơhrăm, vei sơđơ̆ng pơtruh 1,2 kơ sâp hla ar hŏk drơ̆ng 1 nơ̆r lơ̆m teh đak. Bơngai tăh hla tơ̆ dôm xăh hơtăih hơtŏ lơ̆m dêh char apĭnh đei bơngơ̆t truh tơmơ̆t jên jang pơm trong nơnăm vă kơ hiôk lơ̆m oei sa chă năm vih vơ̆t păng pơtrŭt tĕch mơdro hăm băl. Lơ̆m bơ̆jang kiơ̆ tơdrong jang khŭl kơdră chĕp kơ̆l tơring 2 tăl, oei 1,2 tơdrong tơhlăk, ưh kơ ‘lơ̆ng kăl kơ hơmet ming tơtom vă khŭl jang bơ̆jang kiơ̆.