Năr 27/5, Hơnih tơm vei lăng jang Pơgang iung jang hơdoi hăm Hơnih vei lăng kon pơlei dêh char Quảng Ngãi pơgơ̆r Pơm lêh iung jang Khei iung jang kơ yuơ đe hơ ioh sơnăm 2026 hăm hơnăn “Hơ ioh hơnuk hơnoa, sơđơ̆ng, yak kơjăp lơ̆m chăl kơsô̆”. Iung pơma tơ̆ jơ tơlech iung jang, Kơ iĕng Kơdră chĕp pơgơ̆r Teh đak Võ Thị Ánh Xuân pơma hơdăh, đe hơ ioh jĭ tơdrong gei kơjăp hơnô̆ hơnăp kơ teh đak, tơmơ̆t jên jang ăn đe hơ ioh jĭ tơdrong tơmơ̆t jên jang ăn atŏk tơ iung kơ teh đak. Dôm sơnăm ou ki, lơ trong jang tơgŭm djru đe hơ ioh hlôi đei tơlech jang jơnei nhen, ăn hŏk đĕch, tơjur kon jên hŏk ăn đe hơ ioh jăl ƀar pêng; tơgŭm sŏng sa kơ ‘năr dơ̆ng ăn hŏk tro oei sa kơ ‘năr dơ̆ng; tơ iung pơjing hnam trương teh đak rong ‘me … Khei iung jang kơ yuơ đe hơ ioh sơnăm ou gô tơlĕch lơ tơdrong jang ‘lơng hơ iă lơ̆m teh đak nhen pơm hơtŏk hlôh vao kơsô̆ păng sơđơ̆ng trư̆k tuyên ăn đe hơ ioh; tang găn glơ̆k kơ đak, sar bar rơka păng pơgŏ pơrăm đe hơ ioh; hơvơn khul jang vei lăng năng tông đe hơ ioh.