Khei ‘năr âu ki, Ƀô̆ đô̆i vei lăng tơring sơlam Gia Lai hlôi jang đang tơdrong proh hơmet pơgơ̆r jang kiơ̆ ƀlep tơdrong hơgăt, bơ̆jang kiơ̆ ‘lơ̆ng tơdrong jang ƀiên chê̆ păng bơ̆jang kiơ̆ ‘lơ̆ng dôm hơnăp jang đei pơjao.

Tơ̆ jơ bơ̆jang, ƀok Nguyễn Trọng Nghĩa lăng ‘lơ̆ng dôm jơnei mă khŭl lĭnh hlôi iŏk đei; athei đĭ đăng lơ̆m khŭl lĭnh hơnơ̆ng 1 jơhngơ̆m đon, hơdrin; jang ‘lơ̆ng hơnăp jang vei kơjăp tơdrong sơđơ̆ng, pơm tơm tơring sơlam, pơvei hơnih sơđơ̆ng; hơtŏk um rup “Ƀô̆ đô̆i ƀok Hồ”, tơklep hơdai hăm kon pơlei, mă loi ‘noh jĭ kon pơlei tơring sơlam; kơchăng jang tơgŭm tơtom ăn kơdră đảng, kơdră tơring; pơjing trong jang khŭl lĭnh tơklep hăm vei sơđơ̆ng tơring sơlam; hơdai hăm vei sơđơ̆ng ‘lơ̆ng tơdrong jang tơbôl, hơmet ‘lơ̆ng đei yua dôm tơdrong sơđơ̆ng ưh kơ ƀyơh đei, lơ̆m noh đei pơm glăi klĕch tơring sơlam păng pơm glăi tơ̆ đak dơsĭ.