Pơgê 13/1, tơ̆ Hnam hôp teh đak, Kơdră jang lơ̆m anih tơm Chinh trĭ, Kơdră chĕp kơ̆l Ban Bí thư Trần Cẩm Tú, Kơdră Anih pơgơ̆r pơvih ăn hop akŏm bơngai tang măt lơ̆m teh đak mă XIV kơ Đảng pơgơ̆r hơlen năng rim tơdrong hơmet ăn tơdrong jang chinh trĭ tôch gĭt kăl kơ teh đak âu. Kơdră chĕp kơ̆l Ban Bí thư truh hơlen năng tơdrong hơmet pơrŏ tơ̆ hnam hôp; hơlen năng anih chih Hla ar tơroi, Anih pơgơ̆r vei lăng kơ Anih tơm Công an, dôm anih jang kơpal, tơdrong jang pơgang păng dôm trong jang vei lăng sơđơ̆ng. Kiơ̆ đơ̆ng hơlen năng, dôm tơdrong kăl hlôi đei pơm lăp, jang trŏ khei ‘năr hơgăt.

Kơdră chĕp kơ̆l Ban Bí thư athei dôm anih jang hơnơ̆ng jang hơdoi mă kơjăp, hơlen năng mă ‘lơ̆ng rim tơdrong, adrol kơ pơgơ̆r hơlen năng mă hơtuch ăn Hop akŏm Đảng. Hăm dôm nơ̆r pơma apinh đơ̆ng rŏng kơ hơlen năng, Kơdră chĕp kơ̆l Ban Bí thư athei dôm anih tơm, anih jang kơpal jăh sek tơlang, jang kiơ̆ mă ‘lơ̆ng dôm tơdrong hơgăt, hăm đon pơhnŏng dêh hlŏh jĭ pơm ‘lơ̆ng ăn Hop akŏm bơngai tang măt lơ̆m teh đak ‘măng mă XIV kơ Đảng gơ̆h pơgơ̆r đang sơđơ̆ng, ‘lơ̆ng hơiă păng lăp hăm tơdrong janmg chinh trĭ.