Ƀlep lơ̆m năr Lêh Noel sơnăm 2025, tang măt ăn Hơnih bơ̆ jang Trung ương Mặt trận Tổ quốc Việt Nam, Kơdră jang lơ̆m Hơnih tơm Chinh trĭ, Kơdră chĕp pơgơ̆r Hơnih jang Trung ương Mặt trận Tổ quốc Việt Nam Bùi Thị Minh Hoài hlôi pơtruh kơthơ hmach chơt hơ iă truh hăm rim ƀok soi yă giĕng hăm pơ đĭ kon pơlei Kitô Công giáo, Tin Lành lơ̆m teh đak. Lơ̆m kơthơ, Kơdră chĕp pơgơ̆r Hơnih jang Trung ương Mặt trận Tổ quốc Việt Nam pơtruh nơ̆r hmach chơt hơ iă ‘nă hal năr Lêh Noel pran jăng grăng akou, ƀĕnh ƀang jơhngơ̆m đon ‘mêm kơ eng dih băl, atŭm hăm nơ̆r apĭnh jet gia pơma dơnuh ‘lơ̆ng hơ iă truh hăm rim đe ƀok soi yă giĕng păng kon pơlei Kitô hữu Việt Nam. Mặt trận Tổ quốc Việt Nam hôn bơnê kơtang jơhngơ̆m đon “Lui kơjăp tơpăt ‘lơ̆ng - ‘mêm kơ eng teh đak”, “Oei sa gơh găt băt ‘mêm kơ eng dih băl lơ̆m hơdrĕch hơdrung” kơ kon khop hăm kon pơlei lui Tin Lành khei năr ou ki. Lơ đe ƀok soi yă giĕng, bơngai chĕp kơ̆l khul lui hlôi pơm jŭk yŭk trong hơlou pơm kiơ̆ ‘lơ̆ng trong bơ̆ jang Đảng, khôi luơ̆t Teh đak; kơrŭn đĭ ai pơrô̆ pơrôp, pơtho khan ăn kon pơlei lui khop ling lang vang iung jang rim tơdrong jang pơting dih băl ‘mêm kơ eng teh đak, rim ‘măng hơvơn kơ yuơ Mặt trận păng rim khul jang chinh trĭ-tơpôl tơlĕch ăn.