Iung pơma tơ̆ hop akŏm blŭng a, Kơdră chĕp pơgơ̆r Kuôk hô̆i Trần Thanh Mẫn tơbăt, ‘nou jĭ ‘măng hop akŏm mă blŭng kơ khei 1/2026, ‘măng hop akom đei pơgơ̆r lơm khei ‘năr teh đak bơ̆n tŏk bŏk chơt hơ iă sơng kơkuh Hop akŏm tih kơ Đảng lơ̆m teh đak ‘măng mă 14 păng Tơbăt 96 sơnăm năr pơjing Đảng Cộng sản Việt Nam; sơng Têt joăt joe kơ hơdrech hơdrung. Tơ̆ hop akom, hla bơar chih tơbăt đơ̆ng Hơnih bơ̆ jang Tang măt kon pơlei păng Dăr lăng tơbăt, bơngai tăh hla păng kon pơlei hơnơ̆ng tơbăt jơhngơ̆m đon lui kiơ̆ kơjăp lơ̆m tơdrong chĕp pơgơ̆r đơ̆ng Đảng lơ̆m tơdrong ba teh đak atŏk tơ iung, jang kiơ̆ jơnei rim trong tơlĕch ăn; hôn bơnê kơtang tơdrong iung jang hơdoi Kuô̆k hô̆i hăm Khul kơdră chĕp pơgơ̆r Teh đak lơ̆m tơdrong pơjing khôi luơ̆t, pơjing trong tơgŭm djru păng tơlĕch jang kiơ̆, pơjing đei drơ̆ng mĭnh nơ̆r kơtang, jơnei lơ̆m bơ̆ jang vei lăng teh đak. Kơdră chĕp pơgơ̆r Kuô̆k hô̆i athei Hơnih bơ jang Tang măt kon pơlei, hơnih dăr lăng, atŭm hăm rim hơnih bơ̆ jang dăr lăng hơlen tơdrong kơjă, rim tơmam drăm kăl lơ̆m khei năr Têt Nguyên đán Bính Ngọ vă pơm lơ liơ sơđơ̆ng, tôm tong ăn kon pơlei; lăng kơjăp sơđơ̆ng dơ̆ng kơjăp, chinh chĭ, sơđơ̆ng tơpôl hơdrol, lơ̆m, đơ̆ng rŏng Hop akom tih kơ Đảng păng Têt Nguyên đán.