Kơdră chĕp pơgơ̆r Kuô̆k hô̆i pơma hơdăh, Đảng, teh đak lăng ba kơjăp truh hăm kon pơlei bơngai Việt tơ̆ teh đak đe. Kon pơlei bơngai Việt lơ̆m apŭng plĕnh teh pơma atŭm păng Senegal pơma hơdrô̆ ưh kơ gơh tơpleh lơ̆m khul tơgoăt tơgoăl hơdrĕch hơdrung kơ teh đak Việt Nam-Teh đak hlôi đei tơdrong joăt gĭt kăl jơhngơ̆m đon tơgoăt dih băl kơjăp lơ̆m ‘măng iung tơblăh pơm rơngei hơdrĕch hơdrung, adoi nhen lơ̆m tơ iung pơjing păng vei lăng teh đak hrei ou. Tang măt ăn Kơdră chĕp pơgơ̆r Đảng, Teh đak, Khul bơ̆ jang kơpal kơ teh đak bơ̆n, Kơdră chĕp pơgơ̆r Kuô̆k hô̆i Trần Thanh Mẫn pơtruh nơ̆r apĭnh jet gia pơma dơnuh ‘lơ̆ng hơ iă hloh truh hăm kon pơlei bơngai Việt oei tơ̆ Senegal yak hloh dôm tơdrong tơnap tap, tơdrong long vă sơđơ̆ng hơrih sa; adoi bơnê kơ Kuô̆k hô̆i, Khul kơdră chĕp pơgơ̆r teh đak Senegal hlôi tơgum djru kon pơlei bơngai Việt Nam lơ̆m khei năr ou ki păng hơpơi ‘meh vă akhan gô hơnơ̆ng tơgŭm djru vă kon pơlei bơngai Việt tŏk bŏk hơrih sa, jang sa tơ̆ Senegal hơrih sa sơđơ̆ng păng đei tơdrong tơgop tih tên ăn teh đak ou.