Kơsơ̆ năr 23/7, lơ̆m ‘măng iung năm tơmang teh đak Senegal, Kơdră chĕp pơgơ̆r Kuô̆k hô̆i Trần Thanh Mẫn hăm Kơdră chĕp pơgơ̆r Kuô̆k hô̆i Senegal El Malick Ndiaye hlôi vang năm Hop akŏm pơma dơnuh trong bơ̆ jang vă pơtrŭt kơtang jang hơdoi ƀar teh đak. Kơdră chĕp pơgơ̆r Kuô̆k hô̆i Trần Thanh Mẫn tơbăt, Việt Nam đei lơ tơdrong đei gơh vă jang hơdoi hăm Senegal nhen: choh jang sa, kmăi kmŏk kơtơ̆ng ang, kmăi kmŏk kơsô̆, muk drăm lơ̆m teh, rong ka hơdang, tơ iung pơjing ming man păng atŏk tơ iung trong hnam. Kơdră chĕp pơgơ̆r Kuô̆k hô̆i Trần Thanh Mẫn pơma tơbăt jơhngơ̆m đon lui kơjăp rim hơnih tơm, hơnih jang, hơnih mơdro sa ƀar teh đak Việt Nam hăm Senegal gô kơrŭn đĭ ai pơtrŭt kơtang jang hơdoi roi năr roi kơtang lang să, iŏk đei jơnei tih tên. Ƀok athei ƀar păh atŏk kơtang iung jang hơdoi vă tơgum djru hơnih mơdro sa Việt Nam năm tơmơ̆t jên jang tơ̆ Senegal, adoi ‘meh vă Kuô̆k hô̆i Senegal pơjing rơvơn ăn tơdrong jang tơmơ̆t jên jang. Kuô̆k hô̆i Việt Nam jei ling lang tơgŭm djru hơnih mơdro sa Senegal tơmơ̆t jên jang tơ̆ Việt Nam lơ̆m dôm tơdrong đei gơh jang.