Hăm nơ̆r tơbăt ăn “Yom kiơ̆ tơdrong kăp gĭt rơngei hiôk hian, tơplih kơtang vă pơjing ăn hơnô̆ hơnăp kơnh kơjăp ‘lơ̆ng”, Kơdră chĕp pơgơ̆r Teh đak sơkơ̆t hơdăh, 80 sơnăm ou ki, Liên hợp quốc ling lang hơnih tơm kơ tơdrong hơpơi ‘meh vă kơ kon bơngai găh tơdrong rơngei hiôk hian, jang hơdoi păng atok tơ iung, ‘moi kiơ̆ dôm tơdrong kăl kơ tơdrong pơm tơm kơdih kon bơngai, pơm tơm kơdih hơdrĕch hơdrung, hơtŏ hơnơ̆ng păng gơh hơgei tơpôl. Kơdră chĕp pơgơ̆r teh đak hôn bơnê kơ hơnăp jang kơ khul tơring, lơ̆m ou đei ASEAN vei kơjăp hơnih dơ̆ng tơm tơ̆ châu Á–Thái Bình Dương, iung jang kơtang tơ iung pơjing Tơpôl jang ‘lơ̆ng, tôm tong kơjăp ‘lơ̆ng. Kơdră chĕp pơgơ̆r Teh đak tơroi tơbăt găh tơdrong Việt Nam đơ̆ng ngar hơnhok kơ tơblăh vang hrang tơƀet pơm ăn, hlôi đei dơnuh hin, kơhlôh kơvao, răm pơvang tang găn mă lei hlôi hơdrin kĕ yak hloh dôm tơdrong mơmat tat vă đei jing teh đak atŏk tơ iung, jang sa iŏk đei jô̆ hơtŏ sơđơ̆ng, vang mơ̆t hơdoi kơtang păng tơgop kơtang lơ̆m rim tơdrong jang vei lăng rơngei hiôk hian kơ Liên hợp quốc.