Năm ngôi, hmach Têt Kơdră so chĕp pơgơ̆r teh đak Nguyễn Minh Triết hăm Kơdră so chĕp pơgơ̆r teh đak Trương Tấn Sang tơ̆ hnam kơdih, Kơdră chĕp pơgơ̆r teh đak Lương Cường hlôi apĭnh jet gia tơdrong jơhngơ̆m pran jăng, tơdrong hơrih sa kơ bre ƀok. Kơdră chĕp pơgơ̆r teh đak tơbăt jơhngơ̆m đon yom kơtang, hmach bơnê kơtang dôm tơdrong plang, tơgop tih tên đơ̆ng Kơdră so chĕp pơgơ̆r teh đak Nguyễn Minh Triết hăm Kơdră so chĕp pơgơ̆r teh đak Trương Tấn Sang ‘măn ăn tơdrong bơ̆ jang kĕch mang kơ Đảng, kơ hơdrĕch hơdrung; adoi hơpơi ‘meh vă hơnơ̆ng sơng iŏk đei nơ̆r tơgop ‘lơ̆ng rŏ, trŏ lăp hloh đơ̆ng rim kơdră so ăn tơdrong jang tơ iung pơjing păng atŏk tơ iung teh đak lơ̆m chăl hle. Lơ̆m jơ ‘năr chơt hơ iă, phăl hơlăng, Kơdră chĕp pơgơ̆r teh đak hlôi apĭnh jet gia tơdrong hơrih sa, hŏk pơhrăm, bơ̆ jang kơ unh hnam nhap Tổng Bí thư Lê Duẩn,  nhap Tổng Bí thư Nguyễn Văn Linh,  nhap Kơdră chĕp pơgơ̆r Jơnŭm chep pơgơ̆r teh đak Võ Chí Công, nhap Kơdră chĕp pơgơ̆r teh đak Lê Đức Anh; hmach thơ thou ăn ŭnh hnam rim đe nhap ƀok ling lang pran jăng grăng akou, hơnŭk hơnoa, hơnơ̆ng atŏk kơtang jang kiơ̆ tơdrong joăt je kơ ŭnh hnam păng dôm tơdrong tơgop tih tên, ling lang hơdrin hŏk pơhrăm, bơ̆ jang ‘lơ̆ng, plang ăn lơ tơdrong ‘lơ̆ng hơ iă ăn Teh đak, kon pơlei.