Ƀơ̆t tơbăt 96 sơnăm tơ-iung pơjing Đảng; Hop akŏm bơngai tang măt jơ̆p teh đak 'măng mă 14 kơ Đảng đei jơnei keh kong 'lơ̆ng rŏ; Tơbăt 80 sơnăm tơdrong pôk rơih mă blŭng Kuô̆k hô̆i Việt Nam păng hơmet sơng Têt juăt jue Bính Ngọ, pơgê năr 27/1, Kơdră Kuô̆k hô̆i Trần Thanh Mẫn hlôi plang hlôt nhang ƀlŏk tơbăt kơ Ƀok Kơdră Hơnih juăt jang Kuô̆k hô̆i Bùi Bằng Đoàn tơ̆ Hơnih ƀlŏk tơbăt xah Ứng Thiên, pơlei tơm Hà Nội, nhap ƀok Tổng bí thư Trường Chinh, nhap ƀok Kơdră Kuô̆k hô̆i Lê Quang Đạo; năm hơpong ngôi thơ thou Têt hăm Tổng bí thư so Nông Đức Mạnh, Kơdră so kơ Kuô̆k hô̆i Nguyễn Thị Kim Ngân. 

Kơdră Kuô̆k hô̆i sơkơ̆t hơdah, lơ chăl kơdră bơngai jang tang măt Kuô̆k hô̆i hrei ou adoi yuk kiơ̆ trong jang tih đơ̆ng đe mih ma yuk hơdrol, hơnơ̆ng hơtŏk tơdrong hlôh vao, păng đon bơnôh; tơgop pơjing Kuô̆k hô̆i roi năr roi hiôk hian hơtŏ hơnơ̆ng, pơm jang hơgei hloh; tơgăl hăm đon lui đơ̆ng Đảng, Teh đak păng Kon pơlei. Kơdră Kuôk hô̆i sơkơ̆t hơdah, lơ̆m khei năr truh, Kuô̆k hô̆i gô pơtoi tơplih 'nao pơgơ̆r jang, athei kiơ̆ pơkăp 'nao vă pơtrŏ hăm pơkăp roi năr roi tơnăp hloh kiơ̆ tơdrong hơtŏk jang lơ̆m anglŏ sơnăm tơplih 'nao kơ teh đak; pơtoi hơdrin, tơplih 'nao trong pơm jang, tơplih kơtang gah chih akŏm khôi luơ̆t teh đak, kiơ̆ pơkăp chơng trong hơtŏk tơ-iung; hơtŏk jang kơtang hloh, pơjing cham char hơtŏk tơ-iung 'nao; akŏm keh đang tơchơ̆t vă hơtŏk tơ-iung tenh, kơjăp sơđơ̆ng kơ teh đak; khŏm mă jang đei jơnei kiơ̆ pơkăp “Kuô̆k hô̆i kơsô̆”.