Bơ̆jang kiơ̆ tơdrong jang tơƀơ̆p pơma dơnuh hăm bơngai tăh hla đơ̆ng rŏng kơ ‘măng hop akŏm mă mônh, Quốc hội jăl XVI, pơgê 4/5, Kơdră Quốc hội Trần Thanh Mẫn kŭm hăm Khŭl tang măt Quốc hội pơlei tơm Hồ Chí Minh (anih pôk rơih kơsô̆ 12) tơƀơ̆p pơma dơnuh hăm bơngai tăh hla. ‘Măng tơƀơ̆p pơma dơnuh đei bơ̆jang kơtă tơ̆ xăh Hóc Môn păng trực tuyến tơ̆ 10 hơnih pơih pơdăh lơ̆m tivi dôm xăh lơ̆m pơlei tơm Hồ Chí Minh. Tơ̆ jơ tơƀơ̆p pơma dơnuh, tang măt Khŭl bơngai tang măt Quốc hội, Kơdră Quốc hội Trần Thanh Mẫn hlôi tơl 16 nơ̆r tơgop đơ̆ng bơngai tăh hla hăm 6 grŭp tơdrong.

Ƀơm truh teh, chĕng hơmet teh, hnam oei, tơdrong jang mă bơngai tăh hla bơngơ̆t truh lơ hloh, Kơdră Quốc hội Trần Thanh Mẫn tơbăt, Quốc hội hlôi tơlĕch ăn Tơdrong tơchơ̆t 254 hơgăt găh 1,2 tơdrong jang tơgŭm hơdăh vă hơmet pơ ‘lơ̆ng pơmat tat, tơhlăk tơhlĭn lơ̆m pơm kiơ̆ Luơ̆t teh. Kơdră Quốc hội tơbăt, Anih tơm chĭnh trĭ hlôi drơ̆ng nơ̆r trong jang pơjing Luơ̆t Anih kơdrơ̆m gĭt kăl ‘măn ăn pơlei tơm. Tơdăh đei Quốc hội pơdrơ̆ng kiơ̆, dôm trong jang, tơdrong tơgŭm lơ̆m luơ̆t gô tơgop hơmet pơ ‘lơ̆ng dôm tơdrong pơmat tat, tơhlăk tơhlĭn, pơm tơdrong hiôk vă pơlei tơm hơtŏk tơiung lơ̆m rim tơdrong jang mŭk drăm - tơpôl, vei sơđơ̆ng teh đak - sơđơ̆ng tơpôl păng pơjing khŭl jang chĭnh trĭ.