Jang kiơ̆ tơdrong jang tơƀơ̆p pơma dơnuh hăm bơngai tăh hla đơ̆ng rŏng ‘măng hop akŏm mă blŭng, Kuô̆k hô̆i jăl XVI, pơgê brei (4/5), Tổng Bí thư, Kơdră chĕp pơgơr Teh đak Tô Lâm atŭm hăm rim Kơdră tang măt Kuô̆k hô̆i hơnih tăh hla kơsô̆ 1 Pơlei tơm Hà Nội hlôi đei jơ tơƀơ̆p pơma dơnuh hăm bơngai tăh hla lơ̆m 10 phương Ba Đình, Ngọc Hà, Giảng Võ, Đống Đa, Kim Liên, Văn Miếu – Quốc Tử Giám, Láng, Ô Chợ Dừa, Hoàn Kiếm păng Cửa Nam vă tơroi tơbăt pơtôch ‘măng hop akom păng tơl hơdăh nơ̆r tơgop, nơ̆r athei đơ̆ng bơngai tăh hla. Tơ̆ jơ tơƀơ̆p, tơl nơ̆r apĭnh athei đơ̆ng bơngai tăh hla đei ƀơm truh tơdrong jơnei kơ tơdrong bơ̆ jang khul kơdră chĕp pơgơ̆r tơring 2 kâp, Tổng Bí thư, Kơdră chĕp pơgơ̆r teh đak Tô Lâm sơkơ̆t hơdăh, bơngai tah hla hôn bơnê khul kơdră chĕp pơgơ̆r kơ toei hloh, kâp tơring iung jang tơnăp hloh, bơ̆ jang pơm hla bơar jei rơvơn hloh. Mă lei, tơdrong mă kon pơlei hơpơi ‘meh vă ‘noh trong jang hle kăl pơjing đei bơ̆ jang ‘lơ̆ng hloh dơ̆ng lơ̆m pơvih pơvăn ăn kon pơlei păng hơnih mơdro sa; khul kơdră tơring kăl tơpă tơjê̆ hăm kon pơlei, tơklep hăm kon pơlei, băt hơdăh tơdrong ‘meh vă đei tơdrong jang, pơtho pơjing tơdrong jang, tơplih tơdrong jang, tơgoăt dih băl khul kơdră tơring hăm hơnih mơdro sa, ‘moi kiơ̆ hơnih pơtho pơhrăm lăng kơjăp hăm tơdrong jang hăm tơdrong hơrih sa kơ ‘năr kơ kon pơlei. Tổng Bí thư, Kơdră chĕp pơgơ̆r Teh đak Tô Lâm pơma hơdăh mĭnh ƀar trong pơchoh jang tih vă Pơlei tơm Hà Nội akŏm pơrô̆ păng pơgơ̆r jang kiơ̆ lơ̆m khei năr kơnh, lơ̆m ou Hà Nội kăl pơjing Khôi luơ̆t Hơnih tơm păng trong pơprŏ Hơnih tơm lơ̆m mĭnh trong jang kăl vă tơlĕch jang kiơ̆ ‘lơ̆ng kơjăp