Tơ̆ jơ tơƀâp, Kơdră Quốc hội Trần Thanh Mẫn pơma hơdăh, Đảng, Teh đak hơnơ̆ng tơrek truh dôm anih tĕch mơdro pơma atŭm păng Grŭp jang Kơmăy kơmŏk – unh hơyuh kơ teh đak Việt Nam pơma hơdrô̆. Kơdră Quốc hội roi tơbăt, Anih chĕp kơ̆l pơgơ̆r Quốc hội ‘nao tơgop nơ̆r vă tơroi ăn Quốc hội pơdrơ̆ng kiơ̆ tơdrong Hơmet ming Luơ̆t vei lăng păng tơmât jên jang kơ teh đak tơ̆ anih tĕch mơdro.

Tơdrong hơmet ming luơ̆t ‘nâu vă pơjing trong chĕp kơ̆k pơgơ̆r hiôk ‘lơ̆ng, hơmet pơ ‘lơ̆ng dôm tơdrong pơmat tat ăn tơdrong jang xa, tĕch mơdro. Khei ‘năr âu ki, Quốc hội, Khul kơdră teh đak oei hơmet ming lơ kơ luơ̆t ‘moi kiơ̆ trong hơmet pơ ‘lơ̆ng dôm tơdrong oei tơhlăk vă teh đak bơ̆n yak mât lơ̆m chăl ‘nao, chăl jang tŏk đơ̆ng hơdrĕch hơdrung păng jang tŏk hlŏh 8% lơ̆m sơnăm ‘nâu. Kơdră Quốc hội tơchĕng ‘lơ̆ng Grŭp jang hlôi jang ‘lơ̆ng tơdrong vei lăng tơdrong arih xa tơpôl tôch đei yoa, vang tơgop man hnam trưng, pơm gơng, man hnam ăn bơngai đei kŏng, bơngai pơmat tat, vang tơgŭm ăn kon pơlei pŭ răm đơ̆ng sar bar tŏ ‘mi kial kơnê̆, pơrang jĭ phă pơrăm.