‘Năr 25/10, hơlen lăng dôm tơdrong jang tơm păng bơ̆jang hăm kơdră chĕp kơ̆l dêh char An Giang, Kơdră Quốc hội Trần Thanh Mẫn pơma hơdăh jơhngơ̆m đon “3 ưh”; ưh kơ dŭn jơnăr, ưh kơ tơjur pơkăp ‘lơ̆ng, ưh kơ lê̆ đei ƀôh glăi”. Dôm anih jang kăl kơ jang hơdai kơjăp, tơtom hơmet pơ ‘lơ̆ng mơmat tat, băt hơdăh hơnăp jang đơ̆ng bơngai chĕp kơ̆l păng tŭn hrĕnh rim tơdrong jang. Kơdră Quốc hội Trần Thanh Mẫn athei rim tơdrong jang pơyua ăn Hop akŏm tih APEC 2027 tơ̆ tơring gĭt kăl Phú Quốc, dêh char An Giang, athei jang đang hiơ̆ hloh ‘năr 30/6/2027.

Kơdră Quốc hội kŭm athei vei sơđơ̆ng dôm tơdrong jang bơ̆jang hrơ̆ch, lăng kăl trong nơnăm, unh điên, đak, hơmet rơgoh đak ‘mĕ ‘mach, râm rĕk, vei sơđơ̆ng păng tang găn unh sa, pĭt unh sa. Tơdrong jang ăn oei tơ̆ plei hle athei đei bơ̆jang kiơ̆ ‘lơ̆ng, vei sơđơ̆ng kon pơlei lê̆ teh ăn tơdrong jang đei hơnih oei sơđơ̆ng, dang ăi dăh mă ‘lơ̆ng hloh hơnih oei so. Tơdrong bơ̆jang kiơ̆ hrĕnh, ‘lơ̆ng păng hơgăt khôi luơ̆t gô tơgop vei sơđơ̆ng jơnei Hop akŏm tih APEC 2027, hơdai hăm roi tơƀôh um rup Việt Nam hăm bôl buăl apŭng plĕnh teh.