Tơ̆ thôn 12, xăh Bảo Lâm 1, lơ unh hnam kon pơlei hlôi kơchăng yuih hơmet dur var, ‘măng jang tơ̆ hơnăp hnam vă pơjao teh pơm trong. Đei dôm unh hnam athei yuih dur var lơ̆m teh să, mă lei ƀơ̆t đei khŭl kơdră krao hơvơn, roi tơblang găh tơdrong đei yua đunh đai, kon pơlei hlôi drơ̆ng lăp, pơm tơdrong hiôk ăn anih iŏk jang bơ̆jang. Ƀôh tơdrong drơ̆ng lăp đơ̆ng kon pơlei, ƀok Võ Chí Nhân, Ƀok pơgơ̆r thôn 12, xăh Bảo Lâm 1, chhôk ‘nă:

“Kon pơlei tôch kơ lăp đon păng chhôk ‘nă ƀơ̆t iŏk đei tơchơ̆t pơm trong ‘nâu. Kon pơlei dang ei lơ bơngai hlôi yuih hơmet bơ̆n dur var vă ăn kơ anih iŏk jang pơgơ̆r ming man trong âu. Nhôn ‘meh akhan đơ̆ng rŏng âu mưh trong pơm đang gô tôch kơ hiôk lơ̆m tơdrong yka vih vơ̆t đơ̆ng kon pơlei, hŏk pơhrăm đơ̆ng đe mon”.

Đơ̆ng tơdrong drơ̆ng lăp lơ̆m 1 tơdrong jang trong nơnăm ăn ƀôh, ƀơ̆t khŭl kơdră chĕp kơ̆l kơchăng truh hăm kon pơlei, roi tơblang hơdăh tơdrong đei yua păng hơnăp jang, dôm tơdrong tơhlăk tơhlĭn đei dơ̆ng tơdrong hiôk đei yăih hơmet. Trong jang ‘noh tŏk bŏk đei lơ tơring tơ̆ Lâm Đồng tơmơ̆t yua lơ̆m hơmet pơ ‘lơ̆ng dôm tơdrong oei đei ƀơm kơtă truh tơdrong hơrih sa kon pơlei. Tơ̆ xăh Bảo Lâm 3, teh jĭ 1 lơ̆m dôm tơdrong jang đei ƀôh lơ nơ̆r tơgop apĭnh. Lơ̆m ‘măng pơma dơnuh hăm bơngai tăh hla hơtuch khei 9, kon pơlei roi tơbăt dôm tơdrong tơhlăk găh hơdrom hla ar chih răk teh, asong hla ar iŏk yua teh, chĕng teh păng kơjă hrŭ ‘mong. Tơ̆ hơnăp yan âu ‘nâu, khŭl kơdră xăh akŏm klăih song dôm tơdrong jang, băt hơdăh hơnăp jang hơmet pơ ‘lơ̆ng, lăng truh tơ jur pơm mơmat păng pơm kơđeh jơ năr hơmet pơ ‘lơ̆ng. Găh trong hơmet pơ ‘lơ̆ng dôm tơdrong oei đei âu, ƀok Vũ Minh Đoàn, Phŏ Kơdră Anih vei lăng kon pơlei xăh Bảo Lâm 3 pơma hơdăh:

“Nhôn tŏk bŏk akŏm hơmet pơ ‘lơ̆ng dôm tơdrong oei đei, mă loi ‘noh jĭ hla ar teh. Dôm tơdrong đunh kơdâu tam mă đei hơmet pơ ‘lơ̆ng tŏk bŏk đei dăr hơlen, hơmet pơ ‘lơ̆ng pơtôch, vă pơm tơdrong hiôk hloh ăn kon pơlei mưh bơ̆jang kiơ̆ tơdrong jang khŭl kơdră tơring 2 tăl”.

Ưh khan lăp dôm hla ar bơ̆jang, dôm tơdrong jang tơmơ̆t jên jang pơdui đunh lơ sơnăm kŭm tŏk bŏk tơlĕch ăn ‘meh vă athei tơplih trong hơmet pơ ‘lơ̆ng. Tơ̆ xăh Đạ Huoai 3, tơdrong jang Hnam kơmăy đak pơm tơlĕch unh điên Đạ Huoai 2 hăm dôm tơdrong tơhlăk tơhlĭn hloh 20 sơnăm ‘noh jĭ 1 lơ̆m dôm tơdrong hơnat đei tơring akŏm hơmet pơ ‘lơ̆ng. Tơdrong pơgăn tih hloh ‘noh jĭ tơdrong drơ̆ng lăp lơ̆m hrŭ ‘mong, iŏk pơ ‘ngoăih teh. ‘Moi kiơ̆ 8 ‘măng hôp, pơma dơnuh kơtă, khŭl kơdră xăh ƀrư̆ ƀrư̆ hơmet pơ ‘lơ̆ng dôm nơ̆r tơgop đơ̆ng kon pơlei, pơm tơdrong hiôk tơlĕch jang pơtŏ, jô̆ hơlen păng bơ̆jang kiơ̆ dôm hơyak pơtăl dơ̆ng. Tơroi dôm tơdrong tơplih lơ̆m kơplăh hơmet pơ ‘lơ̆ng tơdrong jang, ƀok Nguyễn Văn Trinh – Kơdră Anih vei lăng kon pơlei xăh Đạ Huoai 3 roi tơbăt:

“Đơ̆ng rŏng 8 ‘măng hôp, nhôn hơvơn pơđĭ khŭl jang chĭnh trĭ roi tơbăt, tơblang hơdăh păng hơmet pơ ‘lơ̆ng dôm tơdrong tơhlăk tơhlĭn đơ̆ng kon pơlei. Truh dang ei, tơdrong jang hlôi iŏk đei tơdrong drơ̆ng lăp. Tơring tŏk bŏk jang hơdai tơlĕch jang pơtŏ, jô̆ hơlen vă bơ̆jang kiơ̆ hrŭ ‘mong, iŏk pơ ‘ngoăih teh, hơdrin vă tơdrong jang tơlĕch jang lơ̆m sơnăm 2026”.

Dôm tơdrong tơplih tơ̆ Bảo Lâm 1, Bảo Lâm 3 păng Đạ Huoai 3 ‘noh jĭ dôm tơdrong iĕ lơ̆m hơdrin hơmet pơ ‘lơ̆ng mơmat tat, pơm hiôk jên jang hơtŏk tơiung mŭk drăm kơ Lâm Đồng.

Hla ar chih tơroi tơbăt mŭk drăm - tơpôl 9 khei sơnăm 2026 ăn ƀôh, akŏm jên tơmơ̆t jang bơ̆jang kiơ̆ lơ̆m tơpôl kơ dêh char đei hloh  84.100 ti hlak jên, tŏk hloh 12% pơting hăm khei ‘nâu sơnăm hơdrol. Lơ̆m dêh char đei vă jê̆ 3.000 tơdrong jang tơmơ̆t jên jang oei tơmơ̆t jang, akŏm jên pơm hla ar hloh 947.000 ti hlak jên. Mă lei, dôm tơdrong tơhlăk tơhlĭn găh teh, iŏk teh, hla ar tơmơ̆t jên jang păng tơdrong gơh iŏk jang oei tŏk bŏk ƀơm ưh kơ ‘lơ̆ng truh jang hiơ̆ lơ tơdrong jang.

Tơ̆ hơnăp ‘meh vă pơm hiôk dôm jên jang hơtŏk tơiung, Bơngai jang lơ̆m Trung ương Đảng, Bí thư Đảng dêh char Lâm Đồng Y Thanh Hà Niê Kđăm tơlĕch ăn athei tơplih ‘nao đon tơchĕng vei lăng, hơtŏk ‘lơ̆ng hơnăp jang păng iŏk yua bơ̆jang kiơ̆ lơ̆m đĭ đăng khŭl jang chĭnh trĭ:

"Đĭ đăng khŭl jang chĭnh trĭ athei tơplih pran đơ̆ng đon tơchĕng vei lăng jing đon tơchĕng pơjing hơtŏk tơiung, đơ̆ng kơhret tơdrong hơgăt jing iŏk yua tơpă ‘lơ̆ng. Akŏm hơmet pơ ‘lơ̆ng dôm tơdrong tơhlăk hơtŏk tơiung, tŭn hrĕnh bơ̆jang kiơ̆ dôm tơdrong jang tơm, dôm tơdrong jang oei đei, pơdui đunh păng hơtŏk ‘lơ̆ng đei yua tơlĕch jên tơmơ̆t jang kơ tehe đak. Hơnơ̆ng hơtŏk ‘lơ̆ng jơhngơ̆m đon jang tơnăp, pơma jang hloi, jang kiơ̆ hơnăp jang đei pơjao, hơnơ̆ng hơlen lăng, pơtho tơtă, tơtom hơmet pơ ‘lơ̆ng  tơdrong mơmat tat, tơhlăk tơhlĭn, hơdrin pơm tơplih rơđăh ‘lơ̆ng lơ̆m dôm khei hơtuch sơnăm 2026, jang đang ‘lơ̆ng loh dôm tơdrong hơgăt hlôi tơlĕch ăn”.

Đơ̆ng dôm tơdrong kon pơlei oei sa truh dôm tơdrong jang oei đei lơ sơnăm, tơplih tơ̆ tơring ăn ƀôh iŏk yua ƀlŭng a lơ̆m bơ̆jang khŭl kơdră chĕp kơ̆l tơring 2 tăl tơ̆ Lâm Đồng. Vă dôm jơnei ‘noh đei pơih să păng tưk tơiung, tơdrong gĭt kăl ‘noh jĭ hơnơ̆ng hơmet pơ ‘lơ̆ng tơdrong truh tôch, tơplih đon hơdrin jing đei iŏk yua hơdăh, pơm dơ̆ng tơdrong ‘lơ̆ng ăn Lâm Đồng hơtŏk tơiung.