Mĭnh năr lơ̆m khei 10, Linh tơblăh kơtang nuih mơng kơ Kon pơlei Phan Nhạn đơ̆ng Nha Trang năm ngôi dơ̆ng tơ̆ dơnŏk Vũng Rô, xăh Hòa Xuân, dêh char Dak Lăk. 95 sơnăm arih, jơ̆ng ưh pă jăng, đon pă đei hơbăng bơih, mă lei kơ̆l ‘ngok đơ̆ng Bơngai vei lăng ƀato sơnăm sơ̆ oei ƀlŏk tôm tơdrong dĕch: "‘Măng mă blŭng 'nŏh ƀok Phạm Hùng păng ƀok Phạm Văn Đồng trŭh roi tơbăt ăn nhôn thoi au: Kon pơlei păng khŭl lĭnh tơblăh iŏk rơngei oei gô chang đĭ đăng bơ̆n. Nhôn năm đĭ 7 năr 8 măng ‘mơ̆i mă trŭh tơ̆ Cà Mau."

Lơ̆m tơdrong tơblăh Mi dŏng teh đak, Bơngai tơblăh kơtang nuih mơng Phan Nhạn, Bơngai vei lăng Ƀato ưh đei kơsô̆, vang năm lơ̆m 15 'măng chơ phao kơtoang năm tơ̆ kơdrăn tơblăh kơ tơring Pơbăh. Jơ năr oei sa tơ̆ phương Nam Nha Trang, dêh char Khánh Hòa, 4 pơyan mơ̆ng đak dơsĭ pŏh yă, Bơngai tơblăh kơtang nuih mơng Phan Nhạn roi ƀlŏk hlŏh dơ̆ng dôm 'măng yak tơ̆ trong đak dơsĭ gĭt kăl âu, đei 'măng yak klĕch tơring đak dơsĭ apŭng plĕnh teh đang kơ ‘nŏh mơ̆t lơ̆m tơnŏk. Kŭm đei dôm 'măng ƀato ƀok athei phă hŭt kơdih păng vang iung tơblăh hăm ayăt vă vei kơjăp tơdrong trong yak: "Ƀato nhôn yak, chơ ba tŏ sĕt hlŏh dang 1,5 tân mĭn. Chô̆ hơmet hăm tơlei kip. Inh kŭm jing bơngai chô̆, đăk kip, pơkă jơ, truh jơ ‘nŏh athei pơđôh hŭt ƀato. Jĭ jơhngơ̆m ră mă lei ba kŭm athei chĭu, phă pơđĭ ƀato hloi lĕ."

Tơdăh Bơngai vei lăng jĭ plei nuih ƀato 'nŏh bơngai huơ̆r jĭ pơhngol ƀato. Rim sơnăm, mưh truh năr tơbăt trong Hồ Chí Minh tơ̆ đak dơsĭ, tơbăt tơnŏk Vũng Rô, Bơngai tơblăh kơtang nuih mơng Hồ Đắc Thạnh, bơngai huơ̆r ƀato ưh đei kơsô̆ hơnơ̆ng năm hơlơ̆k dơ̆ng tơ̆ tơnŏk. Tơ̆ anih âu, ƀok kŭm hăm bôl boăl tôch rơgei, bơbĕch hơbal, nuih mơng, kơdâu klĕch tơdrong pơvang găn đơ̆ng ayăt, ăn 3 tŏ ƀato yak mât tơ̆ tơnŏk sơđơ̆ng ‘lơ̆ng, chơ ba vă jê̆ 200 tân phao kơtoang mât tơ̆ Vũng Rô, tơgŭm ăn tơdrong tơblăh Phú Yên păng dôm dêh char găh Khu 5.

Bơngai tơblăh kơtang nuih mơng Hồ Đắc Thạnh tơroi dơ̆ng 'măng tơƀâp ayăt ƀât 'măng mă blŭng yak mât tơ̆ tơnŏk Vũng Rô sơnăm 1964: "Lơ̆m 'măng năm mă 'nŏh, ƀât ƀato năm dăr tơring đak dơsĭ đơ̆ng Quảng Nam Đà Nẵng trŭh tơ̆ Bình Định 'nŏh gre păr ayăt păr dăr joang kơpal ƀato nhôn. Đơ̆ng rŏng kơ hăp păr tŏk tơ̆ kông 'nŏh, ƀar tŏ ƀato khŭl lĭnh ayăt đơ̆ng jih đak dơsĭ kơdâu lĕch tôch hrĕnh, kơdâu vă jê̆ trŭh ƀato 41 đơ̆ng nhôn păng yak hơdai tơtil băl. Đĭ đăng ƀato pơih bơbŭng dơdŏ phao rĕng ƀato nhôn. Ƀât dŏh hơmơt pă băt dang yơ. Tơdăh ayăt băt ƀato nhôn jĭ ƀato chơ phao kơtoang đơ̆ng tơring găh Tu mât lei ưh jor đei tơdrong tơblăh hloi. Ĭnh chân jơhngơ̆m, nhen ưh đei tơdrong kiơ. Đơ̆ng rŏng 1 jơ druh kiơ̆, ƀôh ưh kơ đei tơdrong kiơ đơ̆ng ƀato âu kơna đe sư kơdâu veh tơ̆ nai. 'Noh jĭ jơ tôch hơmơt, tơdrong lôch, arih jê̆ băl hloi."

Oei hăm ƀok Hoàng Gia Hiếu, rơnĕh păng arih xa truh ‘lŏ tơ̆ tơring đak dơsĭ Hải Phòng, hơnơ̆ng rim 'măng truh ƀât lêh tơbăt Năr trong Hồ Chí Minh tơ̆ đak dơsĭ, ƀok Hiếu năm dơ̆ng tơ̆ tơnŏk K15 Hải Phòng vă soh hlôt nhang ăn kơ bôl boăl. Ƀok jĭ linh đak dơsĭ pran kơtang, hơnơ̆ng glơi chă trong adrol vă ăn ƀato mât tơ̆ dôm tơnŏk dơ̆ng. Um rup bôl boăl kơdih kâu lôch tang oei gei hơnơ̆ng lơ̆m kơ̆l ‘ngok ƀok: "'Măng mă ‘noh sơ̆ yak mơ̆t, nhôn pơm kiơ̆ trong hơtat tơmam hơdrol, dang 4 jơ pơgê ‘noh đei nơ̆r athei đơ̆ng ƀok yŏng athei nhŏng oh nhôn lĕch đơ̆ng ƀato đang kơ ‘nŏh phă hŭt lê̆ ƀato ‘nŏh hloi. Kơplăh ƀât doh, ƀato đôh tôch dêh, inh hăm ‘nhŏng Tự ƀơm kơcheh jing đei rơka, ‘nhŏng Thạnh ưh đei tơdrong kiơ. Ƀok Đŏk hăm ƀok Nhợ ‘noh lôch tang."

Lơ̆m 14 sơnăm pơih trong Hồ Chí Minh tơ̆ đak dơsĭ, đei 94 'nu kăn ƀô̆, linh lôch tang. Rim sơnăm, lơ̆m năr tơbăt trong Hồ Chí Minh tơ̆ đak dơsĭ 23/10 păng rim năr lêh tơbăt đei ƀơm truh, đe linh so găh khul ƀato ưh đei kơsô̆ năm hơlơ̆k dơ̆ng tơ̆ dôm tơnŏk lơ̆m teh đak vă soh nhang ƀlŏk hơdơ̆r kơ bôl boăl. Dôm kơvang pơkao đei rim jơhnơr hơtat tơjur tơ̆ đak dơsĭ. Tơdrong lôch tang đơ̆ng đe ‘nhŏng hlôi chih pơjing đei tơdrong kơtang nuih mơng, tôch hơiă lơ̆m tơdrong tơblăh Mi dŏng teh đak đơ̆ng hơdrĕch hơdrung bơ̆n, vă pơlei pơla, teh đak gơh đei năr rơngei hiôk hian.