Thủ tướng Lê Minh Hưng pơma hơdăh tơdrong kăl kơ ‘măng pơgơ̆r mưh đei pơgơ̆r hloi lăp đơ̆ng rŏng tơchơ̆t pơm hơtŏk tơgoăt tơgoăl dih băl. Thủ tướng tơbăt, Ba Lan hrei ou ‘noh teh đak jang hơdoi mơdro sa tih hloh kơ Việt Nam tơ̆ Trung Đông Âu. Hăm tơdrong đei kơtang kmăi kmŏk, jang pơgang, vei lăng sơđơ̆ng teh đak, ŭnh hơyuh kơ Ba Lan atŭm hăm khul 18 tơdrong tơchơ̆t mơdro sa hiôk hian (FTA) păng tơdrong mơdro sa hơ iă kơ Việt Nam, trong tơlĕch ăn tŏk tĕch mơdro dih băl iŏk đei kơ ƀar teh đak truh 6 ti USD ‘noh jĭ gô iŏk đei jơnei. Pơtrŭt hơnih mơdro sa ƀar teh đak jang hơdoi đunh đai, pơtho pơtruh ăn kmăi kmŏk rơgoh ‘lơ̆ng, pơjing rơvơn ăn hơnih mơdro sa Việt Nam vang mơ̆t hlom lơ̆m khul mơdro sa lơ̆m plei teh, Thủ tướng sơkơ̆t hơdăh, Khul kơdră Việt Nam ling lang yak hơdoi, pơjing rơvơn ‘lơ̆ng hơ iă hloh vă rim bơngai tơmơ̆t jên jang kơ Ba Lan jang sa sơđơ̆ng, kơjăp đunh đai tai sơnăm. Găh kơdih kou, Thủ tướng Donald Tusk hôn bơnê kơtang hơnih dơ̆ng kơ Việt Nam - teh đak jang mŭk drăm hơbĕch hơbal hloh châu Á. Thủ tướng Ba Lan tơlĕch ăn rim tơdrong jang hơdoi kăl găh kmăi kmŏk jang pơgang păng pơgang hơmet jĭ, điên tư, chă tơchĕng hơlen atŭm găh kmăi kmŏk dăr lăng hơlen plei teh chih akŏm yưh liu pơvih pơvăn ăn choh jang sa rơgoh ‘lơ̆ng. Ƀok tơbăt, Ba Lan drơ̆ng nơ̆r ling lang jing ‘măng jang pơih să vă hơnih mơdro sa păng tơmam drăm mơdro sa Việt Nam hơnơ̆ng đei tĕch mơdro lơ̆m Jơnŭm atŭm Châu Âu (EU).