Tơ̆ jơ bơ̆ jang, đơ̆ng rŏng kơ mơ̆ng nơ̆r tơroi păng dôm nơ̆r pơma, Kơdră teh đak Lương Cường drơ̆ng nơ̆r hăm dôm tơdrong đei pơma truh, atŭm hăm ‘nŏh pơma hơdăh athei bơ̆ jang mă ‘lơ̆ng, băt hơdăh rim trong jang, nơ̆r pơtho đơ̆ng Anih tơm Chinh trĭ, Ban Bí thư, kŭm nhen  dôm nơ̆r pơtho đơ̆ng dôm anih jang đei ƀơm truh hăm tơdrong pơgơ̆r Tết Nguyên đán Bính Ngọ.

Kơdră teh đak pơma hơdăh, athei hơmetmă ‘lơ̆ng dôm tơdrong kăl vă pơvih ăn kon pơlei sơng xa Têt Bính Ngọ sơnăm 2026 sơđơ̆ng ‘lơ̆ng, hiôk chơt, gơ̆h ‘mơ ‘met, pơjing đei jơhngâm hưch hanh păng jơhngâm pran ăn đĭ đăng Đảng, đĭ đăng kon pơlei, đĭ đăng khul linh adrin bơ̆ jang đei jơnei tơdrong Tơchơ̆t đơ̆ng Hop akŏm lơ̆m teh đak ‘măng mă XIV kơ Đảng đơ̆ng dôm khei blŭng sơnăm 2026 hloi.

Pơgơ̆r mă ‘lơ̆ng tơdrong năm ngôi, jet gia pơma nuh, thơ thou Têt ăn kăn ƀô̆ kră jang kăch mang, mĕ Việt Nam Nuih mơng, linh jĭ rơka, linh jĭ jăn, unh hnam linh lôch tang ăn teh đak, unh hnam đei kŏng hăm kăch mang, unh hnam teh đak athei tơgŭm, dôm bơngai đei hŏk jrŭ, bơngai chih pơcheh, hơri hơxoang, bơngai đei bưng ai, đei kon pơlei lui yom tơ̆ tơring kon kông, đe ƀok pơtho lui khop, dôm khul linh, khul bơ̆ jang ƀât Têt tơ̆ tơring sơlam, achon kông, tơring hơtăih yăih, dôm tơring pơmat tat dêh hlŏh… athei pơm 'lơ̆ng vă rim hnam, rim bơngai đei xa Têt chơt hơiă, 'nă hal ngăl.