Đơ̆ng rŏng mơ̆ng hla ar tơroi tơbăt, dôm nơ̆r tơgop pơma dơnuh, Kơdră teh đak Lương Cường lăng ‘lơ̆ng tơdrong hơdrin đơ̆ng Anih pơvih ăn Kơdră teh đak hlôi kơchăng tơlĕch trong jang păng hơmet ăn dôm tơdrong jang tơtom, pơ ‘lơ̆ng. Kơdră teh đak chih iŏk, pôk pơ ư Anih pơvih ăn Kơdră teh đak jang tơgŭm Kơdră teh đak tơchơ̆t hơpăh tơmam ăn kơ đĭ đăng dôm bơngai đei kŏng lơ̆m teh đak ƀlep ƀơ̆t tơbăt 50 sơnăm Rơngei tơring Pơbăh, jơnei teh đak, 80 sơnăm pơjing teh đak.

Găh trong jang, hơnăp jang, Kơdră teh đak tơ tă, tơ̆ hơnăp kơnh teh đak gô pơgơ̆r lơ tơdrong jang gĭt kăl, athei Anih pơvih ăn Kơdră teh đak hơtŏk tôch ai tơdrong kĕ jang, bơ̆jang tơtĕnh, vei sơđơ̆ng ‘lơ̆ng tơdrong jang pơvih pơvăn kơdră chĕp kơ̆l Đảng, teh đak.