Tơ̆ jơ bơ̆ jang, Kơdră tơm vei lăng ming man Trần Hồng Minh drơ̆ng nơ̆r hăm dêh char hơmet ming tơdrong tơmât jên jang pơm trong gre kơdâu hrĕnh Nha Trang- Liên Khương jing vă bơ̆ jang đơ̆ng 2026-2030; pơjao tơdrong vei lăng ăn dêh char Khánh Hoà. Hăm tơdrong jang pơm trong gre kơdâu hrĕnh Bắc - Nam găh Pơmât, jăl trong Pleiku - Buôn Ma Thuột - Gia Nghĩa, pơjao ăn dêh char Đăk Lắk vei lăng. Hăm tơdrong jang pơm hơmet ming trong gre 27, tơmât lơ̆m tơdrong jang đei jên jang đơ̆ng teh đak kơ dêh char păng apinh Trung ương vang tơgŭm hai.

Vă hơtŏk tơdrong pơm trong tơƀưh, pơih trong ăn tơdrong jang tŏk mŭk drăm-tơpôl đơ̆ng dêh char Lâm Đồng, Kơdră tơm vei lăng ming man Trần Hồng Minh athei hơtŏk hrĕnh tơdrong jang ming man dôm tơdrong jang pơm trong gre tơm nhen: Bảo Lộc - Liên Khương; Tân Phú (dêh char Đồng Nai) - Bảo Lộc (dêh char Lâm Đồng); trong gre kơdâu hrĕnh Bắc - Nam găh Pơmât, jăl trong Gia Nghĩa - Chơn Thành; tơrek truh tơdrong pơm hơmet 3 tơnŏk duk hrei ‘nâu kơ dêh char. Găh trong gre păr. Hăm tơdrong jang pơm hơmet trong păr jur tŏk tơ̆ cham gre păr Liên Khương đei jên jang hlŏh 1.000 ti, bơ̆jang đơ̆ng khei 3 truh khei 9 âu kơnh păng cham gre păr Phan Thiết.