Tơ̆ plei Akô Dhong, phường Buôn Ma Thuột, kon pơlei akŏm năm tơ̆ Hnam hŏk hôp tơpôl răp hơlen lăng ‘măng pơgơ̆r pơih blŭng Hop akŏm XIV kơ Đảng lơ̆m jơhngơ̆m đon chhôk ‘nă. Mŏ H’Tít Alê ô, kon pơlei plei Akô Dhong tơroi:

“Răp hơlen ‘măng Hop akŏm Đảng ‘măng mă 14 ĭnh chhôk hơiă dêh yua kơ ‘nâu jĭ 1 lơ̆m dôm hơyak năm tih kơ teh đak bơ̆n. Ĭnh ‘meh Đảng đei tơdrong jang tơgŭm hơtŏk tơiung găh tơmang lăng tơpôl vă chĕp vei păng tưk tơiung joh ayŏ kon kông lơ̆m chăl mơ̆t jang hơdai.”

Tơ̆ plei Alê A, phường Ea Kao, tơdrong chơt hơiă kŭm păr ang jơ̆p rim hnam kơjung tơ̆ rim jăl trong pơlei pơla. Lơ̆m Hnam hŏk hôp tơpôl, lơ lap kon pơlei hlôi akŏm hôp, răp mơ̆ng hơlen ‘măng hop akŏm blŭng a Hop akŏm. Ƀok  Y-Kanin, kon pơlei plei Alê A tơroi:

“Kon pơlei lơ̆m pơlei nhôn vang akŏm tơ̆ Hnam hŏk hôp tơpôl vă răp mơ̆ng dôm tơdrong roi tơbăt găh Hop akŏm. Nhôn ‘meh akhan Hop akŏm gô tơlĕch ăn lơ trong jang ‘lơ̆ng, tơgop hơtŏk tơiung mŭk drăm - tơpôl, hyơ̆k bơngơ̆t hloh dơ̆ng trŭh tơring kon pơlei kon kông, chĕp vei păng tưk tơiung tơdrong ‘lơ̆ng joh ayŏ kơ rim hơdrĕch kon kông, pơtrŭt tĕch mơdro, pơvih pơvăn tơ̆ tơring.”

Tơ̆ păih Hơlĕch, tơ̆ dôm pơlei jang ka hơdang tơ ter đak dơsĭ, jơhngơ̆m lăng găh Hop akŏm kŭm đei ƀôh chơt hơiă. Lơ kon pơlei jang ka hơdang tơƀôh đon lui păng hơmĕng lơ̆m dôm trong jang tŏk pran, pơm tơdrong ‘lơ̆ng hơtŏk tơiung tôm tong, hơdai hăm ‘meh vă đei dơ̆ng tơdrog jang tơgŭm vă sơđơ̆ng jơhngơ̆m jang tơ̆ đak dơsĭ, tơgop vei lăng tơdrong pơm tơm đak dơsĭ, achon đak dơsĭ kơ Teh đak. Ƀok Đặng Nhu, kon pơlei jang ka hơdang phường Phú Yên pơma hơdăh:

“Nhôn jĭ bơngai jang ka hơdang, ‘meh Hop akŏm Đảng đei tơdrong jang tơgŭm hơtŏk tơiung tơdrong jang ka hơdang vă kon pơlei sơđơ̆ng jơhngơ̆m jang tơ̆ đak dơsĭ, hơtŏk tơiung mŭk drăm hai, vei lăng tơdrong pơm tơm đak dơsĭ, achon đak dơsĭ hai”.