Đei ƀôh tơ̆ phương Bồng Sơn, dêh char Gia Lai - mĭnh lơ̆m dôm tơring tơlĕch jang hrôih rim hơnih oei ‘nao pơvih pơvăn ăn Tơdrong vă jang trong gre treng rĕnh Tu-Pơbăh, đei ƀôh tơdrong vang iung jang hrơ̆p dih băl đơ̆ng khul kơdră tơring păng tơdrong vang jang kiơ̆ đơ̆ng kon pơlei. Lăp đơ̆ng rŏng đei pơrô̆ pơrôp găh trong jang iŏk tơvih teh, lơ unh hnam kon pơlei tơ̆ kơphô̆ Thiết Đính Nam hlôi iung jang hơdoi, drơ̆ng nơ̆r pơjao teh. Ŭnh hnam yă Trần Thị Thu jĭ mĭnh lơ̆m dôm ŭnh hnam hrôih pơjao teh hloh 1.000m² chŭn na ƀa đak păng chơt hơ iă sơng iŏk jên hrŭ ăn.“Dang ei teh đak iŏk tơvih teh vă bơ̆ jang ‘noh đei yoa ăn kon pơlei bơ̆n, ba drơ̆ng nơ̆r hloi, bu bu jei chơt hơ iă ‘nă hal”.

               Tơdrong drơ̆ng mĭnh nơ̆r ou jĭ gơnơm đơ̆ng iung jang ‘lơ̆ng, trŏ lăp yan ou đơ̆ng khul kơdră tơring. Đơ̆ng tơdrong hop akŏm kon pơlei, pơrô̆ pơrôp, tơblang hơdăh trong jang ... đĭ đăng jei tơlĕch jang kơtang, tơpăt hơdăh. Ƀok Lê Văn Phúc, Kơdră chĕp pơgơ̆r koeng kơphô̆ Thiết Đính Nam, phương Bồng Sơn tơbăt, mưh kon pơlei hlôh vao trong bơ̆ jang đơ̆ng teh đak ‘noh tơdrong tơlĕch jang kiơ̆ jĭ tôch rơvơn:“Phương lăng ba tôch kơjăp, koeng kơphô̆ ‘noh pơgơ̆r pơrô̆ pơrôp, tơlĕch trong jang đơ̆ng noh hop akom. Kon pơlei ‘noh lăp đon kơtang lơ̆m pơjing hơnih oei ‘nao vă pơvih pơvăn ăn ming man trong gre treng rĕnh Tu-Pơbăh. Đĭ đăng ŭnh hnam kon pơlei lơ̆m găh iŏk tơvih teh ‘noh hlôi sơng iŏk kon jên hrŭ ăn tôm, kon pơlei tôch lăp đon”.

          Tơdrong drơ̆ng mĭnh nơ̆r jei hlôi lang să truh tơ̆ phương Hoài Nhơn Bắc - tơring đei kơhreng ŭnh hnam kon pơlei đei ƀơm truh đơ̆ng tơdrong vă jang ou. Ŭnh hnam ‘nhŏng Nguyễn Văn Phán, koeng kơphô̆ Hy Văn hlôi pơjao 2 pŏng chŭn na să 1.500m², lăp đon kơtang hăm trong bơ̆ jang đơ̆ng teh đak: “Ŭnh hnam bơ̆n adoi nhen kon pơlei oei lơ̆m koeng kơphô̆ Hy Văn ou drơ̆ng lăp hăm trong tơlĕch jang vă iŏk tơvih teh, proh hơmet tơring ou. Kơ yuơ tơ̆ ou kon pơlei tôch hơ iă kơ yuơ ‘noh jĭ trong jang atŏk tơ iung mŭk drăm-tơpôl kơ tơring kơna kon pơlei drơ̆ng nơ̆r kơtang.”

               Vă iŏk đei jơnei drơ̆ng mĭnh nơ̆r ou, rim kơdră chĕp pơgơ̆r dêh char Gia Lai hlôi tơlĕch jang hrơ̆p mĭnh ‘măng lơ tơdrong jang, đơ̆ng proh hơmet hơnih teh pơjing hơnih oei hle truh chih jô̆, hrŭ ăn păng tơgŭm djru kon pơlei. Ƀok Trần Minh Lâm - Kơ iĕng Kơdră chĕp pơgơ̆r Hơnih vei lăng kon pơlei phương Hoài Nhơn Bắc tơbăt, bơ̆ jang pơrô̆ pơrôp hơnơ̆ng đei sơkơ̆t hơdăh jĭ tơdrong kăl hloh, iung jang hơnơ̆ng dĭng truh keh đang bơ̆ jang hrŭ ăn, iŏk tơvih teh.

               “Nhôn hơnơ̆ng pơrô̆ tơbăt ăn kon pơlei băt hơdăh găh tơdrong jang kăl kơ teh đak vă pơjing đei lăp đon kơtang kơ kon pơlei hơnơ̆ng iŏk jang dơ̆ng dôm jăl trong tơm kơ trong gre treng rĕnh. Mă kăl ‘noh pơrô̆ hơvơn vă kon pơlei drơ̆ng mĭnh nơ̆r păng hrôih pơjao teh ăn tơdrong vă jang vă iung jang ming man tĕnh koăng hloh.”

   Lơ̆m dêh char Gia Lai, Tơdrong vă jang Trong gre treng rĕnh jăl trong Tu-Pơbăh găn hloh 18 tơring, phương, đei ƀơm truh vă jê̆ 4.000 ŭnh hnam kon pơlei, hăm kon jên hrŭ ăn iŏk tơvih teh ‘noh vă jê̆ 6.800 ti hlak jên. Truh dang ei, dêh char Gia Lai hlôi jang keh đang proh hơmet 38 hơnih oei 'nao, sơđơ̆ng hơnih oei sa ăn rim ŭnh hnam đei ƀơm truh. Ƀok Nguyễn Tự Công Hoàng, Kơ iĕng Kơdră Hơnih vei lăng kon pơlei dêh char Gia Lai tơbăt, vă sơđơ̆ng ăn ming man, dêh char vei kơjăp hop akŏm lăng hơlen, adoi pơjing khul jang, tơtom kla hrŭ ăn kon jên ăn kon pơlei.“Lơ̆m khei năr kơnh, tơring kăl iung jang kơtang hloh dơ̆ng păng tĕnh koăng hloh dơ̆ng. Xơkơ̆t hơdăh hơnih ayơ kăl hloh ‘noh iŏk tơvih hrôih vă đei teh ăn hơnih jang ming man. Athei rim tơring ưh kơ kăl chă dăr lăng đĭ đăng 100% mă sơkơ̆t hơdăh kơjă mă jô̆ hơlen hơgăt teh, mă lei jô̆ hơlen truh dang yơ tơlĕch kơjă truh dang noh hloi, kla ăn kon jên truh dang noh hloi păng pơjao teh dôm kon pơlei hlôi sơng iŏk kon jên hrŭ ăn.”

               Hăm tơdrong vang iung jang kơtang đơ̆ng pơđĭ khul chinh trĭ păng mă kăl ‘noh tơdrong lăp đon đơ̆ng Kon pơlei, bơ̆ jang iŏk tơvih teh tơdrong vă jang trong gre treng rĕnh Tu-Pơbăh tơ̆ Gia Lai tŏk bŏk iŏk đei jơnei hơ iă. ‘Nou jĭ hơyak kăl hloh vă tơdrong vă jang kăl kơ teh đak hrôih đei tơlĕch iung jang, pơjing đei hơyak pran ăn atŏk tơ iung ‘nao ăn tơring Tây Nguyên păng lơ̆m teh đak.