Năr 8/4, tơ̆ Hơnih bơ̆ jang Kơdră chĕp pơgơ̆r teh đak, pơgơ̆r hop akom tơbăt hơdăh tơdrong tơchơ̆t đơ̆ng Hơnih tơm Chinh trĭ pơjao ăn Hơnih chĕp pơgơ̆r, Khul kơdră chĕp pơgơ̆r, Ƀĭ thư, Kơ iĕng Ƀĭ thư Đảng kơ Khul kơdră chĕp pơgơ̆r Teh đak păng  tơbăt hơdăh rim tơdrong tơchơ̆t pôk tơmơ̆t rim kơdră lơ̆m Khul kơdră chĕp pơgơ̆r teh đak jăl jang 2026–2031. Tổng Bí thư, Kơdră chĕp pơgơ̆r teh đak Tô Lâm hlôi ăn hla bơar tơchơ̆t ăn Bí thư Đảng Khul kơdră chĕp pơgơ̆r Teh đak, Thủ tướng Lê Minh Hưng atŭm hăm rim Kơdră; adoi pơjao ăn hla bơar tơchơ̆t pôk tơmơ̆t Kơ iĕng Thủ tướng Teh đak Phạm Gia Túc, Đại tướng Phan Văn Giang iŏk jang Kơ iĕng Thủ tướng, Kơdră chĕp pơgơ̆r Hơnih tơm ƀô̆ đô̆i vei lăng sơlam teh đak, atŭm hăm rim Kơ iĕng Thủ tướng păng Kơdră dơnơm, Kơdră chĕp kơ̆l hơnih bơ̆ jang kơpal. Iung pơma tơ̆ Hop akŏm, Tổng Bí thư, Kơdră chĕp pơgơ̆r Teh đak Tô Lâm pơma hơdăh jăl jang ‘nao ưh khan lăp kiơ̆ yok mă kăl yak kơtang atok tơ iung hloh dơ̆ng, dôm tơdrong jơnei đei pơtŏ hăm tơdrong hơrih sa kon pơlei păng hơnih dơ̆ng, tơdrong lui yom kơ teh đak. Tổng Bí thư, Kơdră chĕp pơgơ̆r Teh đak pơma hơdăh tơdrong jang kăl hloh kơ Khul kơdră chĕp pơgơ̆r jăl ‘nao ‘noh pơjing đei trong atoưk tơ iung, pơih đei trong tŏk mŭk drăm, pơjing hơyak pran tŏk ‘nao păng atŏk kơtang bơ̆ jang ‘lơ̆ng lơ̆m jang kiơ̆ vă iŏk đei jơnei dôm trong tơlĕch jang.