Apŭng Đắk Mil đei teh pơtăm ‘long kăp gĭt xă hlŏh kơ dêh char Đắk Nông. ‘Nâu kŭm jing 1 lơ̆m 3 apŭng găh Kơtu dêh char Đắk Nông, pŭ răm lơ hlŏh đơ̆ng ưh kơmăh đak tơruih tơ̆ lơ tơring. Unh hnam ƀok Nguyễn Công Ngãi tơ̆ xăh Đắk Lao, apŭng Đắk Mil đei hlŏh 2 ha cheh phe pơtăm hơlam hăm ‘long sầu riêng. Ƀok ăn tơbăt, unh hnam pruih đak đơt 2 tam mă đang ‘nŏh đak tơ̆ dơnâu 40 (plei Đắk Thọ) đĭ hrơ̆ đĭ bơih: “Sơnăm ‘nâu đak hrŏ hrĕnh dêh, kon pơlei nhôn choh jang ưh kơ tom. Dang ei 1 năr đei dôm jĭt tŏ kơmăy ƀôm đak răp ƀôm, tơruih đak đơ̆ng dơnâu 40, oei đak ro mât lơ̆m dơnâu ‘nŏh gơnơm đơ̆ng kơmăy ƀôm đak đơ̆ng Công ty vei lăng dơnâu đak Đắk Nông. Tơdăh đe sư ƀôm tơmât đak lơ̆m dơnâu hơnơ̆ng ‘nŏh sư pơm lăp dang 1/5 tơdrong ‘mĕh vă đei đak tơruih đơ̆ng kon pơlei tơ̆ au”.

Kiơ Anih vei lăng kon pơlei apŭng Đắk Mil, tŏ phang oei pơm ăn vă jê̆ 5.000 ha ‘long pơtăm tơ̆ tơring vă ưh kơmăh đak. Hơdai hăm ‘nŏh, vă jê̆ 300 unh hnam oei hơmơt ưh kơmăh đak yoa ƀât hơtuch pơyan phang.

Tơ̆ apŭng Krông Nô, 1,2 tơring tơter thong đak Đắk Sôr oei ưh kơmăh đak tơruih ‘năi. Tơdăh ưh kơ đei ‘mi, tŏ phang pơđang gô pơjoă truh 1.000 ha ‘long pơtăm. Kiơ̆ ƀok Võ Văn Minh, Phŏ Kơdră Anih vei lăng choh jang xa păng cham char Đắk Nông, tơdrong tŏ phang pơđang pơtơm ƀơm ưh ‘lơ̆ng truh tơ̆ rơbâu ha ‘long pơtăm, mă lơ ‘nŏh jĭ chĕh phe, tiu păng ‘long xa plei. Đơ̆ng tŏk bŏk khei 3, anih jang kơpal hlôi tơlĕch trong pơchoh đak yoa tơ̆ 1,2 tơring vă tang găn tŏ phang. Mă hơdăh, đak đei ƀôm hơtok đơ̆ng Dơnâu găh Pơmât păng 1,2 dơnâu jŭm dăr găh apŭng Đắk Mil vă pơro ăn tơring tŏ phang pơđang găh dôm apŭng Đắk Mil păng Krông Nô.

Anih vei lăng kon pơlei dêh char Đắk Nông đei hla ar pơtho ăn Anih choh jang xa păng Anih vei lăng kon pơlei dôm apŭng, plt, công ty vei lăng dơnâu đak mă ‘lơ̆ng, hơnơ̆ng dăr lăng tơdrong tŏ phang pơđang păng bơ̆ jang dôm trong jang tang găn tŏ phang pơđang. Dêh char kŭm pơtho tơƀôh hơtŏk hrĕnh 2 tơdrong jang hơtŏk tơdrong đei yoa đơ̆ng iŏk yoa đak tơ̆ apŭng Cư Jút păng apŭng Đắk Mil (hăm kơsô̆ jên hlŏh 500 ti) vă pơm ‘lơ̆ng ăn dôm dơnâu đak đei tơmât yoa ‘lơ̆ng trŏ khei ‘năr, tơtom pơtruh măh mai đak pơyoa ăn kon pơlei choh jang xa păng arih xa./.